Djokovic tan kawl a êng thei rih lo

Player ṭha leh ropui bik ni mah se Novak Djokovic pawh a vanglai a pel tawh a, atan thil a harsa ve ta. Serbian star hian beiseina sang tak nen Monte Carlos Masters khel mah se, a match hmasa berah hneh nei loin a tla nghal.

Nilaini zan khan Djokovic hi a inlan a, seeded pathumna lai ni mah se seeded pawh chang ve phak lo Alejandro Tabilo lakah 6-3, 6-4 in a chak lo; a tihsual vanga a khingpuiin point a hmuh belhkhawm chu 29 tehmeuh a tling.

Grand Slam vawi 24 champion tawh Djokovic hian clay court bika a match hnuhnung 10-ah hnehna a chang a, chung zingah chuan nikuma Olympic gold medal a vuak chhuah pawh a tel.

Mahse, nikum lama Italian Open an khelh ṭuma a ngam loh Chilean tlangval Tabilo lakah bawk a tlawm a, atan kum ṭha a ni thei rih lo; French Open atan pawh duhthusamin a inbuatsaih thei dawn lo niin a lang.

Kum 37 mi Djokovic chuan, "Ka khingpui tur kha player ṭha tak a ni tih ka hre sa a, chuvang chuan match hautak kan khel dawn tih kha chu ka rinawk sa a ni a, ka beisei ang ngeiin a awlsam lo bawk.

"Chutihrualin, khatiang tak khan ka khel chhia ang tih ka ring phak bik lo. Khelh fuh loh leh khelh ṭhat tawk loh chang chu a awm thei tih ka chiang, amaherawhchu tun ṭum ami0 kha chu pawm a harsa," tiin a sawi.

Season hmasa khan Djokovic hian major title a la miah lo, kuminah pawh a tan a harsa dawn. Tennis a khelh hun chhunga nomawi 100-na la tur pawhin tournament dang a nghah leh rih a ngai dawn tihna a ni.

Inkhel dangah Carlos Alcaraz chuan fiahna a paltlang thung. Spanish star hian set a hloh hmasak zet hnuah Francisco Cerundolo chu 3-6, 6-0, 6-1 in a hneh a, last 16 a inhlangkai a ni.

A tir lamah Alcaraz hi khel ṭha tawk lo mah se, a khelh dan phung a pawh hnuah erawh dan theih a ni lo. Game hnuhnung 13 zinga 12 tehmeuh a la thei a, chak phu zawk a nih ang ngeiin hnehna a chang.

Casper Ruud pawhin third round lut turin Spainish mi Roberto Bautista Agut chu 6-2, 6-1 in a hneh. Norway tlangval Ruud hi seeded palina pek a ni, a match lehpekah chuan Alexei Popyrin a hmachhawn leh dawn a ni.

Seeded pariatna Alex de Minaur pawhin set a hloh hmasa - mahse Australian star hian Tomas Machac a hneh. Seeded pasarihna Andrey Rublev chuan tualchhung tlangval Gael Monfils 6-4, 7-6 (7-2) a hnehin, Daniil Medvedev pawhin Alexandre Muller a lo hneh tawh bawk.