Burnley lakah Man United an mualpho Leicester leh Tottenham an chak

Manchester United-in Liverpool an hneh loh hnuah Old Trafford-ah Burnley 2-0 in an hneh lo a, club boruak ṭha lo sa a chhiat belh. Nilaini zan Premier League inkhel dangah Leicester City leh Tottenham Hotspur ten an mualah West Ham leh Norwich City an hneh ve ve thung.

Ole Gunnar Solskjaer-a'n Clarets an mikhual ṭumin hliam vanga an chhawr theih loh sa Marcus Rashford, Paul Pogba leh Scott McTominay bakah Victor Lindelof a hmang thei lo. Hliam vangin United-in harsatna an nei a, chutihrualin Burnley hneh erawh an tih makmawh a ni thung.

United-in inkhel thununin goal chance pawh ngah zawk mah se an ṭantute beisei ang thil a thleng lo. Burnley tan Chris Wood-a'n minute 39-naah ṭha zetin a khung a, khawvel defender manto ber Harry Maguire venna aṭangin a tal put. Minute 56-naah Burnley forward pahnih Jay Rodriguez leh Wood te an in one-two hnuah kum 30 mi Rodriguez hian angle zim tak aṭangin kawh zetin a pet goal. Clarets-in goal zawnah vawi hnih chiah an pet a, goal-ah a luh ve ve avangin chak mamawh United tan mualphona a tling.

Old Trafford-a inkhel entu tam zawkin halftime leh inkhel tawpah United player-te an boo a, minute nga chiah a awm tawh tihin stadium hmun tam zawk a ruak tawh bawk. United hian Solskjaer manager atana an lak ngheh hnuah chak aiin chak loh an nei hnem zawk.

Ole Gunnar Solskjaer chuan, "Thil tam tak ka ngaihtuahnaah a lut a, kan result-ah kan hnual hle. Insawi thiamna tur kan nei lo a, player-te thawhrimna chak nan a tawk lo," tiin an result a ṭha lo tih a pawm. Arsenal defender hlui Martin Keown chuan, "Solskjaer hian season thar chu a daih ka ring tawh lo. Mi tam takin hun la pe se an duh a, amaherawhchu Manchester United a ni a, club lian tak a nih avangin beiseina pawh a sang a ni," tiin a sawi.

United player hlui Darren Fletcher leh Rio Ferdinand te pawhin Manchester United dinhmun a ṭhat loh thu an sawi chhuak. United board-in Solskjaer chungah rinna an la nghat a, ban thawm ri ṭan mah se manager hna a chelh chhunzawm ang.

Leicester City tan Jamie Vardy-a'n ngai ala awh lo a, team erawhin chak hmel an hmu leh ta. Foxes tan hian Harvey Barnes leh Ricardo Pereira ten first half-a goal an khung hnuah Ayoze Perez-a'n second half-ah goal hnih khungin West Ham United 4-1 in an sawp. Hammers-in manager thar David Moyes hnuaiah result ṭha an la nei thei chuang lo a, an goal awmchhun pawh hi penalty aṭanga Mark Noble-a khung a ni.

Tottenham pawhin Champions League khelh beiseina chhi nung turin Norwich City 2-1 in an hneh. Spurs tan Dele Alli-a'n minute 38-naah a khung a, Serge Aurier ball cross a ṭha hle. Norwich tan Teemu Pukki-a'n penalty hmangin minute 70-naah a sut a, Jose Mourinho hote hlauthawng hman mah se Dele Alli thawhrah sengin Son Heung-Min-a'n minute 79-naah chakna goal a khung.