Arteta leh a thawhpuite an nghet

Arsenal chuan an coach Mikel Arteta chauh an thlungnghet lo, a thawhpui midang panga te pawh hun rei zawk cham turin inremna an ziah pui vek a ni - contract thar an ziah thu hi Gunners chuan an puang tawh a ni.

Arteta hian nikum khan contract a lo ziak tawh, kum 2027 thleng atan an inrem mek. Spanish manager bakah hian a assistant pahnih - Albert Stuivenberg leh Carlos Cuesta, first-team coach Miguel Molina, goalkeeping coach Inaki Cana leh set-piece specialist Nicolas Jover te chuan contract hi an ziak vek.

Gunners manager Arteta chuan, "Tum leh duhdan thuhmun nei kan ni a, chumi ti hlawhtling tura kan thawkho zel thei tur hi ka lawm, rei vak lo hnuah chuan kan duhthusam ram kan thlen theih ngei ka beisei," tiin a sawi.

Champions League quarterfinal first leg-a Real Madrid an hneh avangin Arsenal boruak a fuh a, zaninah erawh Premier League an ngaihtuah leh rih a ngai; dar 10:00 hian Emirates Stadium-ah Brentford an mikhual ang.