Durtlang an champion

Cricket Association of Mizoram (CAM) hnuaia inelna - Khaled Memorial 2nd Division Tournament chu Ningani khan khelh zawh a ni a, second division club inelnaah hian Durtlang an champion.

Suaka Cricket Ground, Sihhmuia inkhelah Durtlang hian Chhinga Veng chu wicket hnihin an hneh, league round lama an ngam loh lakah phuba lain nomawi an chawi ta zawk a ni.

Ṭhum vawra vannei zawk Durtlang lamin vawm hmasa an thlang a, duh an thlang sual lo. Chhinga Veng lamin run 109 chiah siamin an out kim a, an batter ṭha Jehu Anderson awm loh a lang - Durtlang tan Ignacius Pankaj Kullu chuan wicket 5 a la a ni.

Durtlang ten vaw ve lehin target sang lutuk lo um mah se a khat tawka wicket an hloh ve reng avangin chak zawk tur sawi mai a harsa. Mahse, a tawpah din chang zawkin an target an um pha ta a ni.

Khaled Memorial 2nd Division Tournament-ah hian team 10 awmin vawi khat ṭheuh an intum kual a, a sang pahnih Chhinga Veng leh Durtlang ten final khelin season thar atan 1st Division-ah an kaisang a. A hniam pahnih Bawngkawn Tyrants leh Lily Veng te 3rd Division lamah an tla thung.