MSL final inhmachhawn tur Zarkawt vs Khatla

Sharda University Mizoram Super League X-ah final-a inhmachhawn tur a chiang ta - Zarkawt BCA chuan semifinal game 3 khelh ngai loin, game 2-ah an chingfel a, Chanmari BC chu 90-63 in an hneh.

Zarkawt hian match hmasa zawkah 85-79 a an lo hneh tawh bawk avangin final an lut. Chanmari tan Gregoryshon Magee chuan point 27 ngawt score-in, rebound 16 la mah se, Zarkawt laka hnehna hlado chham nan a tling tawk lo.

BCA tan Justin Gnanaraj (23 points) a che ṭha a, Marquis Cunningham chuan point 14 bakah rebound 11 a la bawk - hun pawimawhah Lalrina Renthlei tawnhriat ṭha chu chak nan a ṭangkai ṭhin tih kan hmu nawn.

Inrinni zan khan semifinal game 3-naah Khatla TBL an inlan ve leh a, Zemabawk BC chu 109-107 a hnehin final an lut ve zui. Khatla hian semifinal game 1-ah khan 100-91 in Zemabawk hi an hneh a, league round-ah pawh tlawm miah lo team an nih avangin harsatna awm loa final lut zui mai tura ngaih an ni.

Mahse, Zemabawk BC-in ngaihdan dang neiin, semifinal game 2-ah 94-89 in Khatla TBL an lehthal a, Khatlain final lut chiang turin game 3 an nghah thlen a ngaih phah. R. Dengṭhuama Indoor Stadium-ah game 3 boruak a sang takzet - quarter li chhungin chak zawk an awm lo a, overtime khelh a ngai hial!

Team pahnih hi an inngam dun hle - Zemabawk hian quarter khatna chu 31-23 in an la a, quarter hnihnaah hnehsawh taka Khatla TBL 'comeback' in, 38-17 in an la ve thung.

Mahse, quarter thumnaah Zemabawk hi 22-14 in an chak ve leh a, quarter lina pawh 25-20 in an la zui. Overtime khelh zui a ni a, 14-12 in Khatla an chak a, final an lut - Zemabawkin final lut zo lo mah se, MSL-a an season hmasa ber a ni a, inchhuang tur an ni.

Khatla tan Vanlalṭhazuala'n point 33 tehmeuh score-in a che ṭha takzet a, point 42 nei a, rebound 13 latu Nary James pawh a che ropui thlawt - Zemabawk tan Kenneth J. Perkins Jr chuan 28 point neiin, rebound 11 a la a, Lalrozama (29) leh Lalrinzuala (18) pawh che ṭha viau mah se, final luh nan a tawk zo lo.

Hetihlai hian Zirtawpni zan inkhelah beisei loh result hmuh tur a awm - tun season-a chak la nei miah lo Electric BC chuan relegation playoff game 2-ah Champhai BC chu 92-73 in an hneh a, game 3 khelh a ṭul dawn.

Champhai hian an intawn hmasakah khan 86-75 in hnehna an chang a, Zirtawpni zanah erawh thawnthu her danglamin a awm zui - thih leh dam kara leng Electric-in MSL khelh tawh loh an ngaingam lo a, Lalruatkima Sailo leh AS Sarath te an tal na hle.

Ruatkima'n point 30 ngawt a score a, Sarath hian point 21 a neih bakah rebound 11 a la a, Thawhlehni zan dar 8:30-a an intawn leh hunah relegation playoff final khelh ngei tumin an bei na dawn.

Champhai tan Dee Franklin chuan point 23 score-in, rebound 15 a la a, F. Lalrinsanga'n point 15 score-in a tiṭha viau bawk - chak nan erawh a tawk lo a, game 3-ah insiamṭhat an tum ang.