Arsenal beiseina tichuaitu Wissa

Premier League nomawi chu Arsenal tan a hla zel - Mikel Arteta naute hian Brentford lakah an goal khung an hum thei lo a, an mikhual nen 1-1 a inhnehtawkin point khatah an lungawi a ngai.

Gunners hian league match 32 aṭangin point 57 an hmu a, pahnihnaah an awm chhunzawm. An chunga awm Liverpool an phak lohna chu point 10 a ni a, nizan khan Reds an inlan zui a, an chak a nih chuan an inkar hi a zau zual leh ang.

Inhnehtawk

Mikel Arteta-a'n Champions League a ngaipawimawh a, quarterfinal second leg khelh hmabak an nih avangin Bukayo Saka, martin Odegaard, Jurrien Timber, Mikel Merino leh Myles Lewis-Skelly te chu bench lamah a dah hmasa.

Declan Rice leh Thomas Partey ten inkhel bul an ṭan a, mahse midfield-ah an ding dun lo thung - Partey hi tlarhnung sirah khelh tir a ni a, anni pahnih hian goal an sual chhuak tho.

Goalkeeper David Raya-a'n a ball man chu rang takin a lir chhuak a, midfielder Rice chuan chak takin a tlan luh pui nghal. Rice hian a kianga tlan Partey tana lak nuam tawk chiahin box chhungah a lir lut.

Partey tan ball ṭha a ni a, chutihrualin goal sir lam hret a nih avangin atan a awlsam bik lo. Ghana international midfielder hian ball lir lai chu laklawh nei nei loin a pet lut pawp a, goal khung harsat Arsenal an lawm takzet a ni.

Mahse, Arsenal lawm chhung erawh a rei lo - goal an khung aṭanga minute 13 hnuah Yoane Wissa kan hmu. Wissa hian Nathan Collins-a ball tauh chu Wissa hian vir puiin a pet thut a, keeper Raya tan dan hman a ni lo, 1-1 in inkhel a tawp.

Arteta insawifiah

A tirah player ṭha a hahchawlh tir a, goal an khung hnu lawkah captain Odegaard, Lewis-Skelly, Saka leh Timber te a dah lut a, inkhel kalhmang danglam hretin goal an chhuah zui.

Goal an chhuah hnuah Rice la chhuakin Mikel Merino a dahlut a, mahse Spanish midfielder hian danglamna a siam thei ta bik lo, an tan league nomawi beiseina la tawp lo mah se a zui ta hle.

Gunners manager Arteta chuan, "A tira kan player thlan te khan ṭha takin match an khel zo thei tura beisei a ni a, mahse inkhelah chuan kan duh leh beisei ang vek hian thil a thleng vek thei bik lo.

"Real Madrid nen kan inkhelh tur ngaihtuah lutuk anga min sawi erawh a dik lo. Premier League a nih tawh chuan ngaihthah theih a ni lo a, a ṭha thei ang bera khelh kha kan tum chu a ni zawk," tiin a sawi.

Arsenal hian Champions League quarterfinal khel turin April 16, Nilaini zanah Real Madrid an lenchilh zui dawn, an intawn hmasakah 3-0 a an chak tawh avangin semifinal beiseina an nei sang a, an neih ṭhatte nen Spain an pan ang.