KDB telna Man City an mawi

Manchester City-in goal khung an la thiam reng a, Kevin de Bruyne-a'n football mawina a la pho chhuak thei bawk. Inrinni zan khan Pep Guardiola hoten Inrinni zan khan Crystal Palace 5-2 in an sawp a, a sang pali zingah an tel. Season tharah Premier League club pangain Champions League an khel thei dawn a, City dinhmun hi la him lo mah se Palace laka an khelh dan thlirin Europe inelna sang ber an khelh ngei a rinawm hle.

Etihad Stadium-ah City-in bul an ṭan fuh lo a, Crystal Palace-in goal hnih an khung hmasa zawk. Eagles-in minute riatna lekah mawi zetin City tlarhnung an ṭhiat a, an ṭhiat awlsam mah mah. Ismaila Sarr cross chu Eberechi Eze-a'n goal ruak a khung. City-in siphurh sutna remchang an nei a, De Bruyne ball fing chu Omar Marmoush-a'n a hmang ṭangkai lo.

Goal hmaah City an vannei a, minute 21-naah Adam Wharton-a corner pet chu Chris Richards-a'n a tauh lut. Ball hi six yard box chhungah a kal chungin keeper Ederson-a'n a hnek chhuak thei lo. Eagles-in goal hnih an khung hnuah Eze hmangin goal thumna an khungah an ngai a, offside vangin pawm a ni lo.

Palace-in goal thun thei mah se City an hlauhawm ve reng a, mikhual team tan chelh reng thei an ni lo. KDB-a'n a khat mawi tawkin a thiam zia a pholang. Minute 33-naah De Bruyne-a'n freekick aṭangin a pet lut a, mipui an phur thar hle.

Minute thum hnuah City-in siphurh an sut zo a, chance ṭha hlahtu James McAtee-a'n a tihsual thup nan cross ṭha a nei a, hemi aṭanga ball kal hi Marmoush-a'n kawh zetin a pet lut.

First half-ah 2-2 a ni a, second half-ah City-in inkhel an thunun zui. Minute 47-naah De Bruyne siam chu Mateo Kovacic-a'n ṭha zetin a pet lut. City an chungnung zel a, minute 56-naah McAtee-a'n a pet goal a, a siamtu chu goalkeeper Ederson daih a ni.

City khel a hmuhnawm a, minute 79-naah Nico O'Reilly-a'n goal ngana a khung. Pep Guardiola hote 5-2 in an chak a, nomawi an chawi dawn tawh lo tih chiang mah se an thiamna erawh hmuh hmaih theih a ni lo. Hnehna an chan theihnana khel ṭha bik De Bruyne-a'n season tawpah City a chhuahsan dawn a, Belgian midfielder hian khelh hmabakah pawh ṭha takin a hun tawp lam hi hman a tum ang.