Forest hnehtu Everton

Nottingham Forest tan awlsam taka Champions League khelh ngawt theih a ni dawn lo. Premier League season tawp lam inum boruak sangah an chesual, an mikhual Everton lakah 1-0 in an tlawm.

Beisei phak baka season hmang ṭha Forest hian inrintawkna sang tak nen Everton an mikhual a, point hmu turah pawh an inngai hman ngei ang. Mahse, hun tawp hma chiahin Abdoulaye Doucoure chuan Toffees tan goal awmchhun a khung.

Nuno Espirito Santo enkawl Forest hian EPL match 32 aṭanga point 63 hmuin pathumna an ni mek a, kar tawp inkhel dangah an hnuaia awm Manchester City (55 points) leh Aston Villa (54) te an chak avangin an dinhmun a nghet ta lo hle.

Forest manager Nuno chuan, "Tuna kan dinhmun hi kan sual chhuah a ni a, chuvangin kan hma hun pawh kan kuta awm a ni. Midang chet dana kan buai chuan a ṭha lo ang," tiin a sawi a, season thara Champions League khelh leh khelh loh chu an kuta awm a nih thu a sawi.