Chuai thei lo Ronaldo

Cristiano Ronaldo-a'n goal a la khung a, goal a khung ringawt lo - goal ropui a khung. Inrinni zan khan Al Nassr-in Al Riyadh 2-1 in an hneh a, Ronaldo-a'n goal hnih a khung. Saudi Pro League-ah hian tun season-ah Al Nassr tan match 35 khelin goal 32 a khung a, kum 40 nih hnuah pawh innghahna tlak a la ni.

Al Nassr-in kar liam ta khan khualmualah Al Hilal 3-1 in an hneh a, hemi ṭum pawh hian Ronaldo-a'n goal hnih a khung. Al Awwal Park-ah Faiz Selemani hmangin Al Riyadh-in goal an khung hmasa a, first half-ah 1-0 in an hnufual.

Second half-ah Ronaldo a rawn inlar a, minute 56-naah Sadio Mane cross chu Ronaldo-a'n goal ruakah a khung a, goal mawi ni lo mah se goal pawimawh a ni. Minute 64-naah Mane ball khalh luh chu Al Riyadh defender-in ti perin box pawn aṭangin Ronaldo-a'n ball kang lai chu crossbar per dawpin a volley lut. Mane khalh luh hmaa ball petu hi Ronaldo a ni a, ball per nang fuhtu pawh Ronaldo a tho a ni a, Portuguese forward hi ball-in a zawng a ni ber!

Ronaldo hian goal hnih a khung ringawt lo a, a khel ṭha hrim hrim. Al Riyadh lakah hian ball vawi 41 a khawih a, chance ṭha bik vawi li a siam bawk. Portuguese forward hian inelna hrang hrangah goal 933 a khung tawh a, goal 1000 khung turin goal 67 chauh a mamawh tawh.