Vawiin aṭangin MPLU17

Mizoram Premier League Under 17 chu vawiin aṭangin RG Stadium, Mualpuiah khelh ṭan a ni dawn. Inelnaah hian team pariat an awm a, vawi khat ṭheuh an inkhelh kual hnuah a sang paliin knockout stage an khel ang. Semifinal hi May 1, Ninganiah khelh a ni ang a, champion tur zawnna hi May 2, Zirtawpnia khelh tura ruahman a ni.

MPLU17 hi MPL club pual a ni a, record thlir letin che ṭha fal an awm lo. Inelna hi vawi 11 neih a ni tawh a; Chanmari FC, Mizoram Police FC, Aizawl FC, Chhinga Veng FC leh FC Venghnuai te vawi hnih ṭheuh an champion tawh. Chanmari FC hian Jerry Mawihmingthanga hoa inelna hmasa pahnih an champion hnuah an la champion leh miah lo.

Tun ṭuma inelna hmachhawn tur club-te chu Aizawl FC, Chanmari FC, Mizoram Police FC, SYS FC, Dinthar FC, Kanan FC, Kulikawn FC leh Saikhamkawn FC te an ni. Kumin MPLU17-ah MPL11 club-te inel tur an ni a, mahse club pathum Ramhlun Athletic, FC Bethlehem leh Sihphir Venghlun te hrem an ni a, avangin MPL Board chuan MPL11 club ni loin MPL12 club-te a khelhtir.

Chutihrualin MPL kaithar Lawngtlai club MLS an tel theih loh avangin an aiah Kulikawn FC dahluh an ni a, playoff hmanga tling Kanan FC erawh an inlan dawn. Hei bakah hian MPL12 khel tura club hrem hoa khel tura thlan Dinthar FC leh Saikhamakawn FC te an inlan bawk ang.