Champion tum Barca an kal zel
La Liga-ah Barcelona-in champion ngei an tum tih an pholang leh ta a, Inrinni zan khan goal khung lo mah se, khualmualah Leganes chu 1-0 in an hneh.
Leganes defender Jorge Saenz chuan an lamah inkhela goal awmchhun hi a tilut a, Raphinha ball cross chu dan a tumna lamah an goal-ah a tlawh lut.
Barcelona-in hnehna an chan avangin La Liga-a an hmahruaina a sawh nghet a, pahnihna Real Madrid aiin point sarihin an sang mek.
Real hi nizan khan an inlan a, result kan hre hman lo. Carlo Ancelotti nauten khualmualah Alaves an hneh a nih chuan an inkar hi sawrzimin a awm leh ang.
A harsa
Table aṭanga thlir mai chuan Barcelona tan Leganes khelmualah a harsa lo tura ngaih a ni a, mahse, December thlaa team pahnih an intawn ṭum khan Catalan club khelmualah 1-0 in Leganes hi an chak!
Hei chauh a ni lo - relegation zone-ah an awm mek avangin talchhuah ngei an tum a, dam khawchhuah tuma bei mek team hmachhawn hi Barca tan thil awlsam a ni lo.
Mikhual team hian inkhel ṭantir lamah pawh chance an nei zawk a, Barca an vannei hle. Leganes tan Adria Altimira chuan goal hmahruai khung theihna remchang nei mah se Barca keeper Wojciech Szczesny chet ṭhat zan a tawng.
Dani Raba pawhin Leganes tan chance duhawm vawi hnih ngawt a nei a, goal-ah a chantir lo ve ve - second half-ah team ṭha laka chance neih chhawr loh pawizia an tem zui.
A goal
Champions League-a Borussia Dortmund (4-0) sawptu team aṭangin Barca boss Hansi Flick-a'n player pahnih chiah a siksawi a, Catalan club player-te an chau ve deuh niin a lang.
Hei mai a ni lo - first half-ah left back Alejandro Balde chu hliam vanga lakchhuah a ngai a, mikhual team hi a talbuai zawk an ni hman.
Mahse, second half ṭan aṭanga minute thumna lekah Jorge Saenz chuan an lamah a tlawh lut a, goal a luh hnuah Barcelona an hriam sawt bawk a, Leganes tan a harsa tawh.
Barca tan striker chhuanvawr Robert Lewandowski chuan Catalan club tana a goal 100-na tur khungna remchang nei mah se, uiawm takin a chhawr lo a, 'own goal' khungtu Saenz pawhin 'own goal' pahnih a khung teuh hle. A tawpah chuan goal khat a tawk a, Barcelona an chak.