Der Klassiker-ah chak zawk an awm lo

Bundesliga-ah Bayern Munich-in hmahruai belhchhahna hun an bawhpelha Der Klassiker inkhel hmuhnawm zetah Borussia Dortmund nen 2-2 in an inhnehtawk. Allianz Arena-a Bayern leh Dortmund inhmachhawn hma hian Bayer Leverkusen leh Union Berlin te goal awm loin an inhnehtawk bawk.

Bayern hian match 28 aṭangin point 68 an hmu a, anmahni hnaih bertu leh champion lai Bayer Leverkusen aiin point ngain an hmu tam zawk. Vincent Kompany hoten point hnih loh mah se champion kalkawng an zawh zel.

Goal li

Bayern-in an mualah inkhel an thunun a, mahse chance ṭha an hman ṭangkai loh avangin first half-ah goal hmuh tur a awm lo. Dortmund-in goal zawnah an pet hmasak berah an khung a, minute 48-naah Maximilian Beier ball tauh chu Jonas Urbig kap karah a lut.

Minute 65-naah Bayern-in siphurh an sut a, Serge Gnabry-a'n ṭha taka a lakluh hnuah a cross chu Thomas Muller-a'n dang per zeuhin Raphael Guerreiro-a'n goal kilah a khung. Minute li hnuah Gnabry-a'n mual vei lam aṭangin a la lut a, hmahruaina goal a khung.

Bayern chak mai tura ngaih an nih laiin Dortmund-in tha an thlah bik lo. Minute 75-naah Bayern tlarhnungin ball an clear lawk thei lo a, Serhou Guirassy bicycle kick chu keeper Urbig-a'n dang mah se a per chu Waldemar Anton-a'n siphurh sut nan a khung.

Engtin zel?

Bayern-in Champions League quarterfinal first leg-ah Inter Milan 2-1 in an hneh lo a, semifinal lut turin San Siro-a chak ngei a ṭul dawn. Vincent Kompany hoten Europe-a an insawrbing theih nan Bundesliga-a chet ṭhat an mamamawh a, mah se Dortmund lakah point khat chauh an hlawh chhuak.

Bavarians tan season tawp ruala chhuak tur Thomas Muller a la ṭangkai a, Der Klassiker-a'n captain armband a hreng. Inkhelh banah Muller chuan, "Hmabak kan la nei a, league-ah match nga khelh tur kan la nei. Kan khelh hmabaka ka ṭangkai zel theih nan inpeih renga awm ka tum ang," tiin a sawi.