Inter Milan an kal fal hret

Serie A champion lai Inter Milan chuan Inrinni zan khan Cagliari chu 3-1 in an hneh a, an nomawi chuhpuitu hnai ber Napoli lakah point rukin an sang fal, mahse Naples club hian match khatin an khel tlem thung a ni.

San Siro-a inkhelah Inter Milan hian harsatna an tawk lem lo, minute 13-naah Marko Arnautovic hmangin goal an khung ṭan a, chumi hnuah Lautaro Martinez leh Yann Bisseck ten an khung belh, mikhual lam goal neihchhun hi forward Roberto Piccoli khung a ni thung.

Piccoli hian goal dang pawh a khung teuh hle, mahse goalkeeper Yann Sommer nen chauh an inhmachhawn tawh hnuah a hlah a, a team te point a hlawh chhuah pui zo lo a ni.

Inter Milan coach Simone Inzaghi chuan, "Season hmasa khan inelna hrang hrangah match 49 kan khel a, tun season chu April chauh la ni mah se match 48 kan khel der tawh, a nihna takah chuan a hautak hle.

"Mahse, chawl hman kan la ni lo a, zinkawng hautak tak hi kan zawh chhunzawm zel a ngai," tiin a sawi. Nilaini zanah Champions League quarterfinal khel turin Bayern Munich an mikhual zui leh nghal ang.

Serie A inkhel dangah AC Milan chuan Udinese chu 4-0 in an hneh ve bawk. Milan tan hian player pali - Rafael Leao, Strahinja Pavlovic, Theo Hernandez leh Tijjani Reijnders ten goal khat ṭheuh an khung a ni.

Coach thar Igor Tudor kaihhruaina hnuaiah Juventus pawhin hmalam pan zelin, Teun Koopmeiners leh Kenan Yildiz te goal hmangin Lecce chu 2-1 in an hneh a, pathumnaah an inhlangkai, season thar atan UCL beiseina an nei sang zel.