A hunah Spanish GP tlan thei dawn lo
Spanish MotoGP chu kumin May 3-a tlan tur ni mah se a hunah an tlan thei dawn lo. Bike intlansiakna sang ber hi inelna ṭhenkhat ang bawkin coronavirus vangin a neih hun tur sawn hlat angai a ni.
Hri leng vang hian Qatar GP chu ṭhulh a lo ni tawh a; Thailand, United States leh Argentina ramah pawh a hun pangngaiah neih theih a nih dawn loh avangin an sawn tawh bawk.
Spanish GP buatsaihtu lam chuan thuchhuah siamin, "Coronavirus hian kan inelna neih hun tur chu sawn lo thei lo dinhmunah min dah. Inelna kan neih hun tur hi tih chian theih mai a la ni lo, hun remchang dangah puan tum a ni," an ti.
Ram hrang hrang zingah Spain hi Covid-19 tuar zual pawl an ni. Nimin tlai thlenga tihpui zat chu 4,000 chuang an ni tawh a, hri rawn chhuahna nia sawi China (3,281 an thi) ai pawhin thihpui an tam tawh zawk tihna a ni.
Tun dinhmuna a lan dan chuan May 17-a tlan tur French Grand Prix chu kumina intlansiak an neih hmasak ber tur niin a lang. France ramah pawh hian hri leng a nasa tho a, a hunah an nei thei lo a nih pawhin a mak lo ang.