McLaren team an haw kim
Formula 1 McLaren team chu Australia rama an inkhung hran hun chhung a zo tawh a, team thu puangtu chuan an hnathawk zawng zawngte an mahni ramah an haw kim theih tawh thu a sawi.
Tun thla laihawl khan Australian Grand Prix chu a hmuna entu awmin tlan tum a ni. Mahse, tlan chhinna an neih hma deuh lawkin McLaren team zinga mi chuan Covid-19 a kai tih hriat chhuah a ni a, inelna neih tur hi an ṭhulh zui nghal bawk.
Hri kai bakah hian a bul hnaia awm mi 16 ngawt chu Melbourne-ah hian ni 14 chhung khung hran zui an ni a, tunah chuan an hriselna dinhmun endik a nih hnuah an dinhmun a ṭhat avangin chhuah an ni.
McLaren thu puangtu chuan, "Ningani zan khan team member khung hran zawng zawng chu Melbourne aṭangin an chhuak thei tawh a, team enkawltu hna thawk dang la cham bangte nen an haw thei ta," a ti.
F1 team hlun McLaren hian an sumdawnna hmun chu April 14 theng hian an khar lailawk mek a, hri leng dinhmun a zirin hun rei zawk pawh an inkharkhip a ngai mai thei.
Formula 1 hi ram ṭhenkhatah tlan theih a ni dawn lo a, a hun ṭhenkhat sawn a ngai bawk. Team thuneitu lam chuan season calendar siamṭhat an duh, intlansiak 21 awm tur pawh 15-18 vel awm tura siamrem an tum.