Tokyo Olympic atana tling tawhte an dinhmun a pangngai
Kumin nipui laia neih tur Tokyo Olympic 2020 chu nakkum atan sawn a ni a, inelna neih hun tur sawn ni mah se Agence France-Presse (AFP) tarlan dan chuan inlan tura tling tawhte chu an tling chiang chhunzawm ang.
Covid-19 vangin infiamna khawvel a buai a, International Olympic Committee (IOC) president Thomas Bach leh Japanese Prime Minister Shinzo Abe te phone hmanga an inbiak hnuah Olympic hi sawn a ni.
Ningani zan khan IOC leh international sports federation 32-te chuan 'teleconference' an nei a, an kal zel dan tur sawihoin a tling tawh sate tlin nawn tur hi an remti niin a lang.
France khawpui Paris hmun news agency lian AFP chuan, "IOC president Bach-a'n Olympic sawn a nih chhan leh khawvel dinhmun a sawifiah a, chumi hnuah a tling tawhte pawm an nih bakah qualifier khelh chhunzawm chungchang sawi a ni," an ti.
Tokyo Olympic-ah hian infiamna peng hrang hrangah mi 11,000 vel inlan tura ngaih an ni a, inlan tur zinga 57% chu an tling chiang tawh. Inelna ṭhenkhat erawh qualifier an la khel zo lo hle thung - anni pawhin an khel zo chhunzawm tura ngaih a ni.
Nakkuma Olympic neih hun tur hi tih chian a la ni lo a, Japan leh IOC inrem dan hmasaah chuan 'Nakkum nipui zawh hma a neih tur' tih a ni. IOC president Bach chuan, "Tun aṭanga chawlh kar li hnuah a hun puan a ni ang," tiin a sawi bawk.