English Football eng tin nge a kal zel dawn?

Premier League leh Football League hi April 30 thleng chawlh a nih tur thu a chiang tawh a, April 3-ah Premier League club-te an inhmukhawm dawn. Hetah hian inelna ṭan hun lam aiin chawlh hun pawhsei chungchang an rel a rinawm a, May 17 thleng la pawhsei leh tur a ni

.

Season dangah chuan May 17 kar chho hi league tawp hun a ni ṭhin a, tun ṭumah erawh team tam zawk tan match kua khelh tur a la awm avangin UEFA-in an hnuaia ram hrang hrang league-te zo thei tura a beisei hun June 30-ah chuan zawh a harsa tawh khawp ang. 

Premier League hruaitute leh UEFA, European league leh club-te an indawr nasa a, an thutlukna a inan vek a ṭul lo. Hemi awmzia chu Covid-19 vanga tuar nasa Italy leh Spain ten inelna an chhunzawm thei lo a nih pawhin Premier League tan chuan zawh theih dan kawng a awm.

TV lama tichhuaktu leh sponsor-te zahngaihnaah Premier League a innghat thui a,  league thuneitute hian sum petute ngaihdan an thlir tel a ṭul dawn. Chutihrualin club ṭhenkhat tan June 30 hnu lama inelna chhunzawm a buaithlak zual dawn. Liverpool, Newcastle leh Watford ten season tharah thawmhnaw siamtu thar an nei dawn a, July thla aṭang chuan thawmhnaw siamtu lamin an thilsiam tih lar hna an ṭan tawh ṭhin avangin tu emaw ber an inphahhniam a ṭul ang.

Chutihrualin Covid-19 erawh tun hmaa thleng ngai lo a ni a, season hman zawh an duh a nih chuan ruahmanna an siam a ṭul. Coronavirus hi a la bo lo a nih pawhin stadium pakhatah ni khatah match khat aia tam awmin medical team ṭha tak nen inelna hi zawh theih dan a awm a, league hlutna erawh a tlahniam thung ang.

Liverpool chu a vawi khat nan Premier League nomawi chawi thei dinhmunah an ding a, an khelh dan thlirin champion an phu hle. Tun dinhmunah erawh Jurgen Klopp-a hote hian nomawi an chawi thei a nih pawhin an phu khawp chawimawina an dawng dawn lo tiin a sawi thei tawh a ni.