Bayern, Dortmund, Leipzig & Leverkusen German club dang an pui dawn

Khawvel hmun hrang hrangah coronavirus vanga infiamna pawh kalpui chhunzawm theih a nih loh avangin European club-te pawhin harsatna nasa tak an tawk a, inkhel a awm theih miau loh avangin an sum lakluh a tlahniam.

Hetiang karah hian Bundesliga top four club te hian league-a an khelhpui leh second division lam club-ten harsatna an tawh lohna turin sum hi an theh chhuak ta a ni. 

Champions League-a inlan German club palite hian national media revenue aṭanga pawisa hmuh tur an neih chu la loin an share hi club dang ṭanpui nan an hmang dawn a, hei hi euro maktaduai 12.5 a tling. 

Bayern, Dortmund, Leipzig leh Leverkusen te hian anmahni sum bawm aṭangin euro maktaduai 7.5 an theh chhuak bawk a, an club puite khai chhuak tura an hnathawh hian fak a hlawh hle. 

German Football League (DFL) chuan sum sem dan tur hi a buaipui dawn a, DFL hian Bundesliga leh a hnuai chiah Bundesliga 2 a ṭanpui ngai club-te chu sum hi a sem dawn a ni. 

Bayern chief executive Karl-Heinz Rummenigge chuan, "Bundesliga leh Bundesliga 2 lama club-te hnenah an kiangah kan awm reng tih kan pholang duh a ni. He hun harsaah hian vannei zawk ten chak lo zawkte ṭanpui hi kan tih tur a ni a, football khawvel chu kan ṭangho tlat a ni tih pholan kan duh bawk," a ti. 

Dortmund chief executive officer Hans-Joachim Watzke chuan, "An thiam lohna awm miah loa kan club puite an talbuai a nih chuan kan pui ang, tih hi kan dinna a ni sa reng a ni," a ti a, an club chuang kawng hrang hranga hma an lak thu a sawi bawk. 

DFL executive committee thupuangtu Christian Seifert chuan, "He hmalakna hian ṭawngka mai ni lo, a tak rama kan thawhhona ṭhatzia a pholang a ni," tiin a lawmthu a sawi ve bawk. 

German football hian hri leng hluar chhoh ṭantirh lai khan midangte tan entawn tur an lo hnutchhiah daih tawh -  Robert Lewandowski leh a nupui Anna chuan covid-19 do nan euro maktaduai khat an lo thawh tawh.

Leon Goretzka leh Joshua Kimmich chuan 'We Kick Corona' tih dinin euro maktaduai khat an lo inthawh ṭawm tawh a, he pawl hian euro maktaduai 2.5 chuang coronavirus do nan an khawn ngah tawh bawk. 

German national team chuan coronavirus do nan euro maktaduai 2.5 an thawh tawh a, Manchester City tana khel German winger Leroy Sane chuan sum tam tham tak Covid-19 do nan hian a thawh ve bawk a ni. 

German club zingah Schalke-a head of marketing Alexander Jobst chuan an club chu a tawp mai hlauhthawnawmah a din thu a sawi a, relegation zone lama talbuai Werder Bremen player-te chuan an hlawh lak loh mai an hnial loh thu an sawi tawh. 

Borussia Monchengladbach leh Union Berlin player-te pawhin hlawh lak tur an la neih chu lak loh mai an rel a, Bayern leh Dortmund player-te pawhin coronavirus vanga club a talbuai chhung chu hlawh tlem zawk lak an lo ti tawh bawk. 

Footballer ten hlawh lak loh leh tih hniam an pawi tih lohna chhan hi club-a hlawh tlem zawka hnathawk ten harsatna an tawh loh nana an tih a ni ber a, tun dinhmunah Germany football industry hian hnathawk 56,000 vel a nei mek a ni.