Villa mualah PSG lut dawn

Paris Saint Germain chuan an duh ber Champions League nomawi lak tumin thapui an thawh a, club chauh ni loin Ligue 1 thuneitu lam pawhin an theih ang tawkin an ṭhatna tur an ngaihtuahsak.

Zanin dar 12:30 hian Aston Villa khel turin Villa Park an lut dawn. Champions League quarterfinal second leg an khelh turah hian Luis Enrique nauten 3-1 in hma an hruai mek a, tlang turin an dinhmun a ṭha rih hle.

Ligue 1-ah PSG an champion fel der tawh a, kar tawp league match khel loin hahchawlhna hun an nei rei - Villa nen an inkhelh leh hnuah match an la khel leh miah lo, second leg atan an duh anga tam inbuatsaihna hun an nei tihna a ni.

Unai Emery erawh Aston Villa erawhin Southampton an hmachhawn a, 3-0 in an chak. Premier League match an khelh avangin hahchawlhna hun an nei tlem hret a, goal thum an khung bakah anmahni goal lam an venhim avangin an boruak erawh a ṭha.

Paris khawpuia an chak loh hlim khan Emery-a'n, "Villa Park-ah kan la inkhel ve leh dawn a, goal hnih emaw goal thum emaw chu kan khung mai ang," tiin a sawi a, inrintawkna an neih san em avangin PSG hi an huphurh duh bik lo ang.

Nikum October-ah khan Bayern Munich meuh pawh Villa hian an lo hneh tawh, anmahni mualah chuan team hlauhawm an ni. Chutihrualin a tlem berah goal hnih tal an khung a ngai dawn, goal khung tum luatah tlarhnung lam pawp thei reng a ni.

PSG hian Ousmane Dembele an nei - France internatioal forward hian season kal laia inelna hrang hrangah match 41 aṭangin goal 32 a khung tawh, ven ngun ngai bik tur a ni a, midfielder Vitinha leh forward Khvicha Kvaratskhelia an la nei bawk - Villa tan fimkhur a ngai dawn.