MSL-ah tute nge him dawn? Champhai vs Electric

Sharda University Mizoram Super League X-ah final lut a chiang tawh a, relegation playoff final-a inhmachhawn tur erawh a la chiang lo - zanin dar 8:30 hian R. Dengṭhuama Indoor Stadium, Mualpuiah Champhai BC leh Electric Veng BC te MSL-a inhamtan tumin an intawng leh dawn.

MSL aṭangin club pathum an relegate dawn a, Bungkawn LB Associates chu tun season-a relegate hmasa ber an ni. Club pahnih dang an tla leh dawn a, pakhat chu zaninah chinfel a ni ang - relegation playoff final-a chak lo zawk hi an tla leh dawn bawk.

A tawi zawnga sawi chuan, team pahnih tan him turin zanina chak phawt a pawimawh a, zanina chak zawkin playoff final an khel ang. Inkhel boruak a san tawh avangin fans ngahin awmzia a nei thui a, ṭantu ngah zawk tan inkhel boruak sangah boruak ngam a awl dawn.

Electric BC-in tun season-ah a vawi khat nan MSL an khel a, Mizoram basketball inelna sang ber meuh chu a boruak a lo danglamzia temtirin an awm - league round-ah an tlawm fai vek!

Relegation playoff-a game 1-ah pawh Electric hian Champhai an ngam lo a, chak nei loin MSL an mangṭha mai dawn niin a lang hman. Mahse, game 2-ah rin phak baka ṭhain Electric an lo 'comeback' a, 92-73 in Champhai BC an hneh.

R. Dengṭhuama Indoor Stadium-ah Electric a thim reng tawh bik lo a, Zirtawpni zanah a vawi khat nan 'êng' an chhi - Electric veng mipuiin he êng an chhit hi a mih mai loh nan tih tur an nei a, chu chu an veng club ṭawiawm a ni.

Electric mipui hian relegation game dangah chhuanlam an nei a nih pawhin an demawm lo a, tlai dar 5:30-ah an khel ṭhin - tunah erawh zan dar 8:30-ah an inkhel dawn a, inkhel en a nawm vanglai tak tur a nih avangin tlem a thiang lo ang.

Mipui thlawpna chhanglet turin Electric player-te an ṭan ve tho a ṭul. Thih leh dam kara an len meuh kha chuan Lalruatkima Sailo theihna sanzia hahipin kan sawi a, Zonunsanga pawhin mawhphurhna a la ngam - AS Sarath mawlh hi a hmuhnawm leh a nih ngat chuan Champhai tan buaina tham a tling dawn.

Champhai BC-in semifinal an khelh phâk lohna kha point khat chauh a ni a, tunah chuan tla thei dinhmunah an ding! Aizawl khaw pawn aṭanga MSL club awmchhun inpekna hi a sang a, club buaipuitute inpekna hian fans ṭawiawmna ṭha a phu thlawt.

Khawiah nge Champhai khaw chhuak mipui hi an awm? tia zawhna inzawh ngai lo turin Mualpui lamah Champhai mipui an 'tleh' a ṭul a, an khaw club hi Electric fans thawm lian tak kara an thamral an phal tur a ni lo ang.

Chutihrual chuan player lamin ennawm an chhawp ve a ṭul a, Dee Franklin-a'n player danglam bik a nihna a pholan leh a ṭul dawn a, Lalropuia pawhin Champhai khawpui lawmna thlen turin theihna a nei.