Dortmund tan hmabak a ko

UEFA Champions League quarterfinal second leg-ah Borussia Dortmund-in zanin dar 12:30 hian Barcelona an mikhual dawn. Catalan club hi La Liga hmahruaitu an nih bakah first leg-ah 4-0 in an chak tawh a, German club tan thawhchhuah a harsa dawn.

Estadi Olímpic Lluís Companys-a an inkhelh ṭumin Barcelona-in a khat mawi tawkin an pet lut a, Raphinha hmanga bul an ṭan hnuah Robert Lewandowski-a'n a club hlui lamah goal hnih a khung. A tawpah Lamine Yamal-a'n a tawp a khar a, Spanish rawlthar thiamzia hi ha hipa sawi tham a tling.

Barca manager Hansi Flick hian Bayern Munich a enkawl tawh a, Dortmund hrechiangtu a ni. German manager Flick hian a naute attacking football a khelhtir ṭhin a, Bayern a enkawl lai leh Germany a enkawl laiin an goal bawh a na ve ve. Barca a enkawl hnuah pawh goal an khung thei zel a, tun season UCL-ah pawh match 11-ah goal 36 an khung tling der tawh.

Mahse, first leg-ah chiang taka hnehna an chan avangin Flick hian player ṭha ṭhenkhat a awltir a nih pawhin a mak hran lo ang. Robert Lewandowski hi kum 36 mi a ni tawh a, tun season-ah inelna hrang hrangah goal 40 a khung tawh. Polish striker hi hahdamtir tur zingah a ngaih a ni a, a aiah Ferran Torres-a'n bul a ṭan thei ang.

Lamine Yamal erawh kum 17 mi chauh a ni a, player danglam bik chu ni lo se hahdam hun mamawh ve tur a ni. Mahse, Yamal zawng a danglam deuh a, match zawng zawng khelh duh chi a nih bakah a theihna a san avangin Signal Iduna Park-ah inlan tura ngaih a ni thung.

Barcelona hian kartawp khan Leganes 1-0 in an hneh a, Borussia Dortmund pawhin phurna tur an nei - Der Klassiker-ah Bayern Munich 1-1 in an chelh. Signal Iduna Park-a khel tur an nih avangin Dortmund ṭantu ruhkawl 'yellow wall'-in an pui dawn.

Dortmund manager Niko Kovac chuan, "Thil ṭha lai ka hmu a, tuna ka hna tur chu ka player-te hrilh chhawn a ni," tiin a sawi a, thilmak thlentir an tum thu a sawi. Mahse, Dortmund hian Barca vawi ruk a hmachhawn tawhah chak an la nei lo.