Silly Point : Hosanna/Khengbet rawh
Infiamna khawvela, fans te baka hriattrenga nei chhia leh tuihal hi an awm kher lo ang an ti fo ṭhin a, tunhnu hian a dik viau dawnin ka hre telh telh mai. Professional infiammite hi 'script' awmsa, va chanchawp ni lo, mahnia khelmual zau taka an 'script' va inziah chawp a, a changtupa emaw misualpa nih thei reng dinhmunah ding hi an ni tlat si a. Chu tak chu infiamna khawvel ropui danglamna a ni tlat lawi si.
Hosanna
Windies wicket keeper batsman Nicholas Pooran leh Tamil batsman Sai Sudharsan te chu Lucknow Super Giants leh Gujarat Titans tan an arsi langsar ber an ni a. Lucknow leh Ahmedabad khuaah zin la, he mite pahnih poster hi kil tinah a lo intar ang.
Kumin na na na chu an bat-a an tawh apiang hi rangkachakah a chang a ni ber. Kumhlui lama khenbeh tura fans ten an au el fo val upa Virat Kohli leh Shreyas Iyer a ten "Old is Gold" tih ṭawngkam hi an rawn nemnghet kan ti thei bawk ang.
Chennai Super Kings lam hian kumin chu chhuan tur nei tam lo viau mah se, bowler mit la ber Afghan tlangval Noor Ahmed an kawl hi a ni mai awm e. India team aṭanga thlauhthlak avanga theihpalingkawh a rawn ṭang emaw tih mai tur Shardul Thakur leh Kuldeep Yadav te pawh kumin chu an team telna Lucknow Super Giants leh Delhi Capitals tan bang rinawm tak a ni mek. India Team selector-te ho a lawmawm zawnga luhai tirtu a ni ngei ang.
Khengbet rawh
IPL ṭum 17 kan hmuh tawh zingah champion ngun ber chu Chennai Super Kings leh Mumbai Indians te an ni a, ṭum nga ve ve an champion tawh. Kuminah erawh erawh motor engine mumal tawh lo ang maiin an khawsa mek a. India tana retire tawh Ravichandran Ashwin a hi hmana Ashwin kha a ni ta meuh lo? kan ti thei anga, CSK run leak-na bowler ber a ni tlat.
MS Dhoni pawh a lo tar ve ta a. India captain Rohit Sharma tan lah ICC T20 an champion leh hmanni lawka fanau malsawmna an dawng tih loh chu, kum lungchhiatthlak a hmang a ni ber awm e. IPL history a man to ber LSG captain (vaibelchhe 27 man) tan IPL theihngilh tlak a ni ngei ang. Match nga a khelh tawhah tawh 40 runs chiah la vaw chhuakin, a khelhna LSG hian a run khat Siam apiangin nuai 67 an chawi ang vel a ni.
Golgotha lamtluang
IPL 2025 league stage chanve kan lo thleng chho dawn reng ta mai. Rinloh deuh deuh superstar thar an piang a, hranghlui baptisma leh harhna chang thar ang awm laiin, hranghlui chul zo ta tih tur kan hmu nuk mai.
Team 10 ten nitin he Golgotha kawng hi zawh ang a ni a, a tawpah erawh team 1 chiah tlang chhip thleng tur an awm. Infiamna khawvelah hian zawng, infiammi te hian an zinkawngah hosana leh khengbet rawh tih hi a khat tawkin an aukhum reng dawn a. An cham rei poh leh an au hla dawn hnem tur pahnih a ni.
Mahse, he league stage inkhel hnuhnung ber a zawh hma loh chuan tuna Hosanna/ Khengbet rawh tia fans te au khumna hi chu engmah lo mai a la ni hrih e.