Mbappe 'Out' mah se Real an chak

Pathianni zan La Liga inkhelah Real Madrid forward Kylian Mbappe chu hnawhchhuah a ni a, mahse, Mbappe chhuah hmaa goal an khung hman hlauh avangin Alaves khelmualah Real an chak.

Real Madrid tan Eduardo Camavinga chuan minute 34-naah goal hmahruai a khung a, minute li hnuah Mbappe hnawhchhuah a nih avangin Real-in hun tam zawk player 10 nen an khel.

Hetihlai hian Alaves pawhin player 11 nen inkhel an khar thei bik lo a, minute 70-naah left back Manu Sanchez chu hnawhchhuah a ni - hun tawp thlengin goal dang a lut lo a, Real an chak.

Real hian hnehna an chan avangin Barcelona an hnaih leh sawt a, league match sarih khelh tur la awmah hmahruaitu hi point liin an thlau mek - May 11 zan khian league-ah Barcelona hian Real an la mikhual leh dawn tih theihnghilh lo la!

Goal & red card

Real Madrid manager Carlo Ancelotti-a'n kar hmasaa Valencia an ngam loh ṭumin tun season-a a yellow card pangana a hmu a, Italian coach hian Alaves lakah a team chu khelmual sir aṭangin a ho theih loh phah.

Mahse, coach tel lo pawhin an talbuai lo tih Real Madrid-in an pholang a, minute 34-naah Camavinga chuan penalty box pawn aṭangin goal mawi zet a khung - harsatna nei loin an chak dawn niin a lang hman.

Beisei angin thil erawh a kal lo. Minute 38-naah Mbappe-a'n a ât a so a, Alaves defensive midfielder Antonio Blanco chu a ngalah na takin a tlawh - referee Cesar Soto Grado-a'n yellow card a phawrh zet.

Mahse, video assistant referee (VAR) a inrawlh a, referee chu khelmual sirah thil thlen dan en turin thurawn a pe. Cesar-a'n monitor-a uluk taka en letin, Mbappe a hnawt chhuak ta zawk. French striker tan Real a pan hnua a red card hmasa ber a ni a, an league match khelh leh tura Athletic Bilbao an mikhual hunah a inlan thei lo ang.

An talbuaina

Player pakhatin Real an tlem a ni satliah lo a, a chhuak ber hi inkhel thlak danglam thei khawpa theihna nei sang bik Mbappe a nih avangin Madrid khaw club an talbuai zui.

Real keeper Thibaut Courtois chet ṭhat zan a ni hlauh a, mikhual team an vannei - Belgian keeper hian vawi ruk ngawt save a nei a, a team mualpho tur a chhanhim tiin a sawi theih.

Ancelotti naute hian kar hmasa khan Valencia chu league-ah 2-1 in an ngam lo a, a hnuah Champions League quarterfinal khel zuiin, Arsenal chu khualmualah 3-0 in an ngam lo bawk.

Nilaini zanah second leh khel turin Gunners an mikhual leh dawn a, hei hi Ancelotti-a'n hre rengin, Vinícius Júnior leh Jude Bellingham te chu Alaves lakah pawh bul a ṭantir duh lo.

Mahse maw...

Real-in La Liga nomawi an la beisei ve tho avangin an chak loh chuan a pawi thui dawn tih a chiang a, Ancelotti-a'n Gunners hmachhawn tura a dah ṭhat Vini leh Bellingham te pawh a luhtir leh hial.

Mahse, player pahnih hi minute 62-naah a ruala a luhtir chungin inkhel boruak an thlak danglam lo a, second half chhung zawnga Real-in target-a 'shot' an neih zat chu vawi khat chiah a ni - Alaves-in vawi nga an nei thung.

Vini pawhin a thawh ṭhat bera chhal theih chu Alaves defender Manu Sanchez-a'n amah vanga red card a chawi chu a ni deuh mai a, player 10 ve vea an khelh hnuah pawh Real-in goal an khung belh lo.

A tawpah erawh minute 34-naa Camavinga goal chu an chakpui a, Barca an hnaih sawt - Santiago Bernabeu-a leng tur Arsenal-in he inkhel hi an lo en ve ngeiin a rinawm a, 3-0 a an hneh tawh team hi an huphurh lo lehzual sawt ang.