Bahrain-ah Piastri a chak ber

Oscar Piastri tan chuan Pathianni zana tlan zawh tak Bahrain Grand Prix kha hun chhinchhiah tlak a ni. Car intlansiakna sang berah a vawi 50 nan a inlan a, driver ṭha dangte hma a thlengin hnehna a chang bawk.

Sakhir circuit-ah Piastri hi a tlan ṭha hle a, intlansiak a thunun chhuak tia sawi ngam a ni. McLaren driver hnungah hian Mercedes car khalhtu George Russell a thleng, pathumna chu Piastri-a teammate Lando Norris a ni thung.

Australian tlangval Piastri chuan, "Qualifying aṭangin ka tlan ṭha em em a, ka tan chuan chawlhkar duhthusam a ni ber mai. Team lamin min pui ṭha hle, hnehna ka chan theih nana ka mamawh angte min chhawp chhuahsak a ni," tiin a sawi.

Driver championship lamah Piastri hian point 74 hmuin pahnihna a ni mek, a chungah point 77 neitu Lando Norris a awm thung - McLaren driver pahnihte a chung lamah an awm a ni a, tun season chu midang tan elpui hautak an ni dawn.

Champion lai Max Verstappen chu paruknaah a thleng a, Red Bull driver hian season hmasa chawhnu lam aṭang khan intlansiak a thunun thei tawh bik lo; atan nomawi humhim tur chuan thapui thawh a ngai dawn a ni.

Beiseina sang tak nena Ferrari zawmtu Lewis Hamilton pawhin a duh angin hnehna a la chang thei bik lo. World champion vawi sarih ni tawh hi panganaah a thleng a, championship point 25 chauh a la hmuh avangin a vawi riat nana world champion nih chu a harsa dawn niin a lang.