Monte Carlo champion Alcaraz

Carlos Alcaraz chuan player ṭha bik a nihna a lantir leh ta - Pathianni zan tir lama khelh zawh tak Monte Carlo Masters final-ah Lorenzo Musetti hnehin a champion.

Clay court hi Alcaraz inkhelh thiamna hmun a ni a, atan Court Rainier III, Monaco pawh hmun ṭha a ni. Spanish star hian Musetti lakah set hmasa hloh mah se 3-6, 6-1, 6-0 in a tho chhuak, boruak sangah a ṭha zawk a nihna a lantir.

Kum 21 mi Alcaraz tan ATP Masters 1000 trophy parukna a ni tawh a, nikuma Indian Werlls title a lak hnua a champion lehna hmasa niin, tennis a khelh hun chhunga a nomawi chawi tawh erawh 18 zet a tling tawh.

Grand Slam vawi li champion tawh Alcaraz chuan, "Kan tan chuan tunlai hi hun nuam leh awlsam a ni lo. Tennis court pawn lamah ngaihtuah tur tam tak ka nei ve a, inkhelhna hmunah duhthusam taka khelh ka harsat bawk.

"Chawlhkar khat mai a ni lo a, thla khat lai chu ka khel ṭha tawk lo tawh tih ka hria. Chutiang boruak kara hnehna ka chang thei hi ka lawm a, inelna lian atan inrintawkna pawh min siamsak ngei ang," tiin a sawi.

Alcaraz hian set khatna bikah pawh forehand chauh pawh chhiarin 14 ngawt mai ama tihsual vangin a khingpuiin point a hmu a, a ṭhat dan berin a khel lo tih chu a chiang. Mahse, set hnuhnung pahnihah erawh game khat chiah a hloh thung.

Grand Slam dawta inelna ngaihhlut Masters 1000 huangah hian champion tan ranking point 1000 hmuh theih a ni a, tun kara world ranking chhuak tharah Alcaraz hian a chunga awm Alexander Zverev khumin pahnihna dinhmun a luah dawn a ni.

Tennis clay court season an hmang mek a, clay court bika inelna lian ber French Open chu May 25 aṭanga June 8 chhungin Paris khawpuiah an khel leh ang.