Roma leh Laizo inhnehtawk

AS Roma chu an mikhualna ramah Lazio nen 1-1 in an inhnehtawk. Claudio Ranieri enkawl Roma hi Serie A match bikah chuan match 16 chhung tlawm loin an kaltlang mek a ni.

Stadio Olimpico-a inkhelah, mualneitu Lazio tana Alessio Romagnoli-a goal khung chu second half-ah Roma lamin Matias Soule hmangin an sut a, goal dang lut zui tawh loin point khat ve vein an insem.

Roma manager Claudio Ranieri chuan, "Football match tam tak ka enkawlin ka kaihruai tawh ṭhin a, mahse Rome Derby hi chu a boruak a danglam ziah. Stadio Olimpico khat tlata mipui an punkhawm tawh hi chuan min deh dan hi a danglam.

"Manager ni chung chuan ka tana Rome Derby a ni tawhin a rinawm a, chuvangin a lunglen thlak pawh ka ti. Mahse, kei chu Roma ṭantu ka ni a, chuvangin hetiang inkhel hi chu ka la en leh ṭhin ang," tiin a sawi.

Roma hian Serie A match 32 aṭanga point 54 hmuin pasarihna an ni mek a, an chunga awm Lazio an phak lohna chu point hnih a ni - season thara European football inelna sang hmachhawn thei turin an inum chho zel ang.