Michel Hidalgo a thi
Euro 1984-a France champion puitu coach Michel Hidalgo chu hun rei tak chhung damlohnain a tlak buak hnuah kum 87 mi niin a thi a, a chhungte chuan Hidalgo thih thu hi French radio station hnenah an hrilh a ni.
Hidalgo hian Les Bleus hi 1976 - 1984 inkar khan a enkawl a, 1982 World Cup-ah semifinal a thlenpui hnuin 1984-ah khan an ram ngeiah Euro nomawi a chawipui.
Final-a 2-0 a Spain an hneh hnuah Hidalgo hian a hna kalsanin a assistant Henri Michel chu a kian a, France national football team-ah hian technical director a ni zui.
Kum 1986-ah Marseille enkawlin director of football a ni a, kum 1991 hnu lamah coaching career chu kalsanin football pundit hna a thawk zui a ni.
Euro 84-a France captain Michel Platini chuan, "French football dinthar leh tu a ni," tiin a pu hlui hi a thlah.