Chanmari tan I League a hnai

Aizawl FC-in I League an khel chhunzawm dawn a, Chanmari FC pawhin I League an hnaih ta hle. April 19, Inrinni chawhnu dar 1:00 hian Mizo club-in hmahruaitu Diamond Harbour an hmachhawn dawn a, hnehna an chang a nih chuan season tharah I League an khel thei ang.

Dipankur Sharma hote hian I League khel turin point hnih chiah an mamawh tawh a, an hnuai chiaha awm Sporting Clube de Goa an chetsual chuan point khat mah hmuh belh loh pawhin an tling thei bawk.

Mahse, a tawp lama pressure a awm loh nan Mizo club tan Inrinnia engkim chinfel a pawimawh. Chanmari hian I League khelh tumin theihtawp an chhuah a, tun hnaiah Mizo striker tawnhriat nei ṭha Malsawmfela an la lut. Mizoram Police striker hi Sat Tirur an hmachhawn ṭumin bench aṭangin a lut.

Diamond Harbour hi Chanmari FC-in I League 3 final leh I League 2 match hmasa zawkah an hneh tawh lo a, Sawmfela telin mahni mualah hneh an tum dawn. Mizo club hian hnehna an chang a nih chuan I League khelh phak bakah I League 2 nomawi thlenga an la chawi theih dan a la awm.