Inter khelmualah thawhlehna beiseitu Bayern

Champions League quarterfinal second leg-ah zanin dar 12:30 hian Inter Milan chuan Bayern Munich an mikhual dawn a, tun season UCL quarterfinal-a fixture ngaihven hlawh pawl hi a hmuhnawm leh dawn.

Allianz Arena-a team pahnih an intawn hmasak ṭumin Inter an chak a, inkhel boruak sangah manager patuai Vincent Kompany ai chuan Inter coach ṭha mi Simone Inzaghi-a'n boruak a ngam zawk em ni chu aw, tih theih a ni.

Bayern-in San Siro-ah Inter lehthal an tum dawn a, a harsa dawn tih sawi zawng ringawt pawh hian a chiang. Mahse, Kompany chuan, "San Siro-ah chance kan nei dawn tih kan hria a ni," a ti a, 'comeback' theih a beisei.

Mahse, Inter coach Inzaghi hi Serie A-a Inter lo champion pui tawhtu, Champions League final hial lo hruai thleng tawhtu a ni a, Kompany-a beisei ang ngawtin San Siro-a Nerazzurri hneh hi thil awlsam a ni lo ang.

Boruak a 'hot'

Allianz Arena-a an chak ṭumin Inter-in an chak an lawm chiam a, Kompany mit a lo kham! Burnley boss hlui hian, "Inkhelh zawhah khan Inter-in an chak an lawm chiam lai ka hmu a, mahse, keini chuan chawlhlawk kan hmang chauhah kan la ngai," a ti a, Italian club chu chak lawm hma lutukah a puh.

Mahse, Inzaghi a ngawi mai mai bik lo. Italian coach ṭha hian Inrinni zan Serie A-a Cagliari an hneh zawhah Kompany hi kapin, "Kei chuan zanina Cagliari laka ka tih ang chiahin ka team kha minute hnih vel ka lawmpui mai a ni," a ti.

Inzaghi hian a duhtawk mai lo a, kum 49 mi coach chuan, "Kei ka ngaihdanah chuan Munich kha an inchhuang hle a, khawvela player hlawha inseng hnem ber club an ni," a ti zui deuh kher!

Bayern tana Inzaghi ngawihtirna ṭha ber chu San Siro-a 'comeback' a ni a, mahse, Italian club hian player ṭha rual an kawl ve tho avangin Bayern tan hna a awlsam lo ang.

Beiseina leh buaina

First leg-a an tlawm hnuah Bayern boss Kompany chuan, "San Siro-ah hnehna kan chang thei ang tih kan ring a, rin loh chhan tur lah kan nei hek lo. Kan theihna zawng zawngin kan khel dawn a ni," a ti.

Mahse, Bayern hian buaina pakhat an nei - player inhliam an nei nual! Goalkeeper chhuanvawr Manuel Neuer a la inhliam avangin kum 21 mi Jonas Urbig chuan si ban a nghah leh a ṭul dawn a, San Siro boruak sangah eng tak ang maw?

Hei chauh a ni lo. Centre back pahnih Dayot Upamecano leh Hiroki Ito an la dam lo a, wing-back Alphonso Davies leh midfielder Jamal Musiala te pawh Milan khawpuiah an zin thei dawn lo - Bayern hmabak a hautak hle.

Inter-in hliam an nei ve tho a, Denzel Dumfries leh Piotr Zielinski te an chawl mek. Mahse, player pahnih awm loh laiin Inter an buai lutuk lo a, an league match hnuhnung berah Marcus Thuram, Alessandro Bastoni leh Henrikh Mkhitaryan te ho an hahdamtir theih bawk avangin hlauthawng loin an khel ang.

A ṭha zawk

Team ṭha zawk thlan tur ni se, thlan harsa khawpin club pahnih squad a ṭha tawk a, chutihrual chuan khualmuala goal khata hma hruai sa, mahni muala khel tur Inter hian Bayern an inlehthal tir a nih chuan mualphona a tling ang.

Kum 27 mi Lautaro Martínez bawk hi Bayern tlarhnung tana ven uluk ṭul a ni dawn a, Argentine striker hian tun season inelna hrang hrangah match 42 khelin goal 20 a khung tawh a, assist vawi ruk a nei tawh bawk.

Marcus Thuram pawh hian goal 17 leh assist vawi kua a nei tawh a, midfield-ah ni se, Nicolò Barella leh Hakan Çalhanoğlu te ho an awm avangin Bayern tan hna a awlsam dawn lo tih a chiang.

Wing back-ah Benjamin Pavard leh Federico Dimarco an nei a, tlarhnung laiah Alessandro Bastoni leh tawnhriat nei ṭha Francesco Acerbi te an inkawp thei - si ban nghaktu hi Yan Sommer a ni bawk.

Goal khung harsat

Bayern-in tlarhma player nei ṭha mah se, tun hnaiah goal khung an harsat a, an match hnuhnung pahnihah vawi 46 ngawt shot nei mah se, goal thum chiah an khung!

Tun season ringawta goal 34 leh assist 12 nei tawhtu Harry Kane awmna team tih atana mawi lo khawp a ni a, zaninah English striker-in goal khung thiam biak a nihzia a pholan a ṭul. Kane chuan, "Goal hmaah kan hriam lehzual a ngai a ni mai. Inter nena kan intawn hmasak kha, ni dang ang chu ni se, goal thum emaw li tal chu kan khung ang," a ti.

Hetihrual hian goal khung hi Kane-a mawhphurhna bik chauh a ni lo tih hria a, Leroy Sane leh Michael Olise te pawhin mawhphurhna an lak a ṭul a, inhliam an ngah viau chungin bench aṭanga lut turin Serge Gnabry leh Thomas Muller an la nei bawk.

Bayern player pawimawh Joshua Kimmich chuan, "Kan beisei hi thilmak a ni lo a, hnehna chan kan mamawh a ni mai," a ti a, San Siro-ah an chak theih a beisei - zaninah kan hre dawn e.