Kane a chhuah ringtu Shearer
Premier League goal khung hnem ber Alan Shearer chuan Tottenham-in nomawi an chawi mai lo a nih chuan an striker Harry Kane chu chelh reng a harsat a rin thu a sawi chhuak.
England international striker leh captain ni bawk Kane hi khawvel striker 'hot' berte zinga mi a ni a, mahse ram leh a khelhna Spurs tan nomawi a la chawi miah lo.
Season hmasa khan Kane awmna North London club hian Champions League final an lut hial. Amaherawhchu, an mahni aia English team ṭha zawk Liverpool an ngam lo. World Cup-ah pawh khel ṭha viau mah se an tawpna chu semifinal a ni.
Kum 26 mi Kane hi tunah chuan malpui hliam vangin a chawl mek a, January thla hnuah a la inkhel leh lo. EPL season kal lai khelh chhunzawm leh pawh ni se kuminah chuan nomawi an chawi tawh dawn lo.
EPL goal 290 khungtu Shearer chuan Kane chungchang sawiin, "Kum khat dang awm chhunzawm se, chumi chhunga nomawi engmah an chawi lo a nih chuan a chhuah ka ring," tiin a sawi.
English football inena sang bera goal khung chungchang sawi zawmin Shearer chuan, "Tun dinhmunah Kane hian league goal 136 a khung tawh a, theihna a nei sang hle tih chu tuma zawh buai ngai loa chiang a ni.
"Mahse, chungnung bera awm tur erawh chuan hmabak a la ngah, a khelhna chu Spurs emaw eng club emaw pawh ni se taksa hrisel a neih a ngai a, inhliam loa khelh tluan theih a ngai bawk," tiin a sawi.
Kane hian mimalin training a nei leh thei tawh a, tun season tawp hmain a inlan leh thei pawh a rinawm. England captain hian Covid-19 len chhung chuan mitin mahni in lum ṭheuhah him taka awm turin a lo chah tawh a ni.