McGregor a luang chhuak dawn
MMA fighter rothap Conor McGregor chuan coronavirus hri leng mek do nan Ireland-a damdawi in te thuam ṭha turin hma a la a, a bungraw sem tur hlut zawng hi euro maktaduai khat bawr vel a ni ang.
Kum 31 mi Irish fighter hian Thawhlehni khan an ram Ireland chu in kharkhip (lockdown) mai turin sorkarin a ngen a, social media kaltlanga a ngenna lo hmutu Irish Minister for Finance Paschal Donohoe chuan McGregor hi social media kaltlangin a be zui.
McGregor chuan an ram Finance Minister nena an inbiakna hi twitter lamah a pholang zui a, hetah hian Paschal chu euro maktaduai khat man hu Covid-19 laka invenna bungrua a lei tur thu a hrilh a ni.
UFC fighter lar ber ang hiala chhal ngam chuan, "Euro maktaduai khat man hu bungrua ka lei dawn a, hengte hi kan chhehvela Covid-19 do nana nasa taka hma latu damdawi inah te ka sem dawn a ni," a ti.
Irish finance minister Paschal hian McGregor chu a larna chhawr ṭangkai a, mipuite zinga a huhoa awm loh pawimawhna leh pawn chhuah loh hram hram a ṭulzia hrilh hre turin a ti a ni.
Covid-19 in Europe a luhchilh mek karah Republic of Ireland an him bik lo a, an ram mipui zingah mi 1,300 chuangin he hri leng hi an kai tawh a ni.