Hull-in Coventry an chelh

Premier League hnuai chiah inelna Championship-ah Hull City-in playoff beiseina nei Coventry an mikhual a, minute 82-naa Abu Kamara goal hmangin Tigers-in si phurh an sut a, 1-1 in an inhnehtawk. MKM Stadium-ah Coventry-in Matt Grimes hmangin minute 46-naah hma hruai hmasa mah se an ṭan tluan theih loh avangin point hnih an hloh.

Coventry hian point 63 hmuin playoff khel thei chinah an awm a, match li khelh hmabak la awmah anmahni hnaitu West Brom leh Middlesbrough aiin point thum chauhin an hmu tam zawk. Championship-a champion leh pahnihna team te Premier League khel turin an inhlangkai a, pathumna aṭanga parukna team ten playoff hmangin hmun ruak pakhat an inchuh leh bawk.

Championship-ah Leeds United leh Burnley ten point 88 an hmu mek a, champion tur a la chian loh ang bawkin playoff khel tur a la chiang lo.