Cherries chak ve leh ta

Premier League match ruk zet a zawna an chak zawh loh hnuah Bournemouth chuan hnehna hlado an chham ve leh ta a, Thawhṭanni zan khan an mikhual Fulham chu 1-0 in an hneh.

Bournemouth tan Antoine Semenyo chuan second 53-na lekah goal hmahruai a khung a, hun tawp thlenga goal dang lut tawh loin Cherries an chak - Fulham hian kar hmasa khan Liverpool chu 3-2 in an hneh a, a hnua an inlan hmasak berah an chak lo lehnghal!

Cottagers hian chance nei lo erawh an ni lo a, goal hmaa an hriam tawk lohna chu an vanduaipui tiin a sawi theih - first half chhungin Rodrigo Muniz, Ryan Sessegnon leh Joachim Andersen ten si phurh sutna remchang an nei a, an chhawr lo vek.

Bournemouth tan Chelsea aṭanga loan-a an hawh, goalkeeper Kepa Arrizabalaga chet ṭhat zan a ni a, khawvela goalkeeper man to ber hian Alex Iwobi leh Sasa Lukic te khung ngei tur nia lang chu ṭha zetin a dansak.

Cherries hi goal an khung piahlamah chance nei lo tawp an ni bik lo. Evanilson chuan hnai set sawt aṭangin crossbar a pet per a, Brazilian striker hi penalty hlawh chhuak hmanah a inngai hial bawk.

Evanilson hi Fulham keeper Bernd Leno chuan titluin, penalty a beisei a, mahse, referee Michael Oliver chuan penalty-ah a ngai lo - video assistant referee (VAR) chuan Oliver thutlukna hi a nemnghet bawk a, 1-0 in Cherries an chak.

Cherries hian hnehna an chan avangin season thara European football khelh an beisei chhunzawm zel. Tunah hian table-ah pariatna an ni mek a, League Cup champion Newcastle United leh FA Cup champion-ten top seven-a season an khar chuan, pariatna nih hi Europa Conference League khelh phak nan a tawk dawn a ni.