Swansea neitu zingah Modric

Real Madrid and Croatia legend Luka Modric chuan Championship club Swansea City neitu nihna a lei a, midfielder ṭha mi chauh ni loin investor leh club neitu tiin a chanchin a ziah theih tawh ang. Andy Coleman, Brett Cravatt, Nigel Morris leh Jason Cohen ten nikum November thla khan Jason Levien leh Steve Kaplan te hnen aṭangin Swansea neitu nihna an lei a, tun ṭumah hian Modric hian neitu nihna tlem azawng a lei leh bawk.

Swansea hian kum 39 mi Modric sum thehchhuah zat chiah an tarlang lo a, club chuan, "Kan club khawvelin a hriat theih nana hmalak chu Modric-a hna hmasa tur a ni. Khelmual chhung leh pawna club hmasawnna tur a ngaihtuah ang," tiin thuchhuah an siam.

Modric hi Real Madrid-ah player pawimawh a la ni a, tun season La Liga-ah match 29 khelin Champions League-ah match 13-ah a inlan tawh a ni.