Kum 43 mi Dhoni a la tar lo

Chennai Super Kings-in match nga chhung chak hmel an hmuh loh hnuah MS Dhoni-a hmangin Thawhṭanni zan khan Lucknow Super Giants wicket ngain an hneh. Lucknow-in 166/7 runs an siam a, ball thum chauh dah bangin CSK-in 168/5 runs siamin hnehna an chang a, a tawp khartute chu kum 43 mi MS Dhoni leh Shivam Dube te an ni.

Ekana Cricket Stadium B Ground-ah Chennai-in vawm hmasak an thlang a, CSK bowler-te an khel ṭha lo. Noor Ahmed-a'n wicket la lo mah se 13 runs chauh a pe a, Ravindra Jadeja (24/2) leh Matheesa Pathirana (45/2) ten wicket hnih ve ve an la. Super Giants tan Rishabh Pant-a'n 63 runs siam mah se 166/7 runs chauh an siam pha.

Super Kings tan Shaik Rasheed (27) leh Rachin Ravindra (37) ten bul ṭan chhe lo mah se Rahul Tripathi (9) leh Ravindra Jadeja (7) ten run an siam tam tawk lo. Shivam Dube a rawn che ṭha a, thi loin 43 runs a siam. A tawpa hming langsar chu Dhoni bawk a ni a, kum 43 ni tawh mah se Dhoni hian pressure sangah ball 11 aṭangin 26 runs a rawn siam a, CSK a chakpui.

Zanin dar 7:30 hian Delhi Capitals leh Rajasthan Royals te an inkhel dawn. IPL khelh mekah Delhi Capitals hi pahnihnaah la awm mah se hmahruaitu Gujarat Titans aia match khata an khelh tlem avangin an la che ṭha ber. Delhi hian Rajasthan hi an hneh a nih chuan hmahruaitu an ni thei ang.