Napoli an chak chiang

Scott McTominay-a goal hnih bakah Romelu Lukaku-a goal khat khung hmangin Napoli chuan Empoli 3-0 in an sawp a, point thum an hmuh leh tak avangin an chunga awm Inter Milan an hnaih leh ta hle.

Kar tawp inkhelah Inter Milan an chak a, Serie A champion lai hi an sang fal hman. Mahse, Antonio Conte enkawl Naples club an chak ve leh tak avangin an inkarah point thum chauh a awm leh ta a, match khat chetsual a pawi thui thei hle tihna a ni.

Diego Armando Maradona Stadium-a inkhelah, midfielder McTominay-a'n goal hnih a khungtu hi Lukaku siamsak ve ve a ni a, Belgian striker hian Mathías Olivera siamsak a khung ve thung a, nuamsa takin hnehna an chang.

Napoli manager Antonio Conte chuan, "Empoli khan Serie A khelh chhunzawm ngei tumin thapui an thawh a, theihtawp takmeuh a an beih avangin hmachhawn pawh an harsa hle, goal thum faiin chak mah ila inchhuang thei kan ni lo.

"Kar tawp inkhelh a zawh khan chanchinbu ṭhenkhat chuan Serie A champion tur a chiang tawh ang maiin an ziak a, tunah chuan thawnthu a danglam leh tawh ang. Italian champion nih tuma inum boruak kan siam avangin kan chungah chanchinbu mite pawh an lawm turah ka ngai," tiin a sawi.

Serie A match khelh hmabak paruk an la nei a, pahnihna ni lai Napoli hian club lian hmachawn tur an nei tawh lo. Inter Milan erawhin AS Roma an la mikhual dawn a, Champions League leh Coppa Italia khelh tur an la neih bawk avangin chetsual a la hlauhawm dawn hle a ni.