France leh Portugal an inlan dawn
Zanin dar 12:15-ah World Cup qualifying khelh a ni dawn a, Euro 2016 final-a inhmachhawn France leh Portugal an inlan dawn. Team langsar zingah Belgium leh Netherlands dawn bawk a, Euro quarterfinal aṭanga tla Belgium hi coach thar hnuaiah insiamṭhat an tum mek a, Euro 2016 an khelh phak loh hnua talbuai Netherlands erawh tun thlengin an la insiamṭha lo.
France hmaah Bulgaria
Euro final an khelh hnuah France-in beiseina sang tak nen World Cup qualifying-ah bul ṭan mah se an match hmasa berah team tenaua ngaih Belarus chu goal khung loin an inhnehtawkpui a, an group-ah hian team ṭha Netherlands leh Sweden an awm ve tho bawk si avangin zanina Bulgaria an hmachhawn hunah chak loh a thiang tawh lo - hei erawh hriatreng a ṭha, France hi Antoine Griezmann leh Paul Pogba te awmna team an ni tih hi.
Thawnthu hlui thlirlet chuan France hian Bulgaria an mikhual tawh vawi rukah vawi nga hnehna an chang thei a, zaninah inrintawkna nasa tak nen Bulgaria an mikhual ang. Team pahnih an inhmachhawn tawh vawi 14-ah erawh Bulgaria an chungnung zawk a, vawi sarih chak zawkah ṭangin vawi khat an inhnehtawk a, France hi vawi ruk an chak thung.
France coach Didier Des-champs-a'n khelmual pawn buaina avangin Real Madrid striker Karim Benzema a la ko duh lo cheu a, Euro 2016-a striker rinrawl Olivier Giroud chu hliam vangin koh a ni lo a, Atletico Madrid striker Kevin Gameiro chu Arsenal striker hmunruakah hian koh a ni.
Insiamṭhat hun
Netherlands-in Euro 2016 an khelh loh khan an ram chanchina kum 14 hnua inelna lianthama an inlan phak loh hmasa ber
ṭum a ni a, football thiam ram tia sawi ṭhin Netherlands fan-te rilru na a dam thei lo - an fan-te rilru na thawi dam nan Netherlands hian World Cup 2018 khelh ngei an duh a, an match hmasa berah Sweden chu 1-1 in an inhnehtawkpui.
Danny Blind-a enkawl team hian zaninah Belarus an mikhual dawn a, an tan insiam-
ṭhatna remchangah ngaih theih. Netherlands tan Bayern Munich forward Arjen Robben chu a hliam a la damkawr deuh avangin koh a ni lo a, mah se Wesley Sneijder leh Georginio Wijnaldum te ho neitu team tan Robben tel lo tur hi Belarus laka buai phahna tur niin a lang lo.
Team pahnih hi Euro quali-fier-ah vawi ruk inhmachhawn tawhin Netherlands hian vawi li hnehna an chang a, Belarus hian vawi hnih hnehna an chang ve thei. World Cup qualifier-ah erawh team pahnih an la inhmachhawn ngai lo a, zanin hi an inhmachhawn hmasak ber tur a ni - chak lo zawk nih an duh lo ve ve ang.
Ronaldo hoin Portugal
Euro nomawi an chawi hnu-ah ram tan Cristiano Ronaldo la inlan leh lo mah se zaninah erawh a inlan thei tawh dawn a, Portugal khelmuala lenglut tur Andorra tan thil hriat nuam a ni hauh lo ang. Hetihlai hian Sporting Lisbon midfielder Adrien Silva leh Southampton defender Cedric Soares te chu hliam vangin an inhnukdawk a, Valencia winger Nani chu Andorra hmachhawn tura a in fit tawk loh avangin Benfica forward Pizzi chu a aiawh tur hian koh a ni bawk.
Portugal coach Fernando Santos-a'n Euro nomawi an chawi zawhah beiseina sang tak nei mah se World Cup qualifier-a an match hmasa bera Switzerland an lenchilh ṭumin a team hi hnehna a chanpui zo lo a, Ronaldo tel loin an mikhualna ramah 2-0 in an tlawm. Tunah chuan Real Madrid forward hi a dam chian tawh avangin Portugal tan Andorra lakah chhuanlam siam a thiang dawn lo.
Team pahnih an inhma-chhawn hnuhnung ber 2002 FIFA world Cup qualifying-ah khan Portugal hian Andorra hi an khelmualah 3-0 in an hneh a, khualmualah 7-1 a an sawp theih bawk avangin zaninah pawh chak zawk ni tura beisei an ni.
Intiat tawk
Everton boss hlui Roberto Martinez enkawlna hnuaia insiamṭhat tum mek Belgium-in Bosnia-Herzegovina an mikhual dawn a, an match hmasa berah buaina nei loa Cyprus 3-0 a an sawp theih avangin zaninah inrintawkna nasa tak nen Bosnia hi an mikhual thei ang. Hetihrual hian Bosnia hi dah hniam theih an ni bik lo - an match hmasa berah Estonia chu 5-0 a an sawp theih avangin team ṭha an ni tih hai rual a ni lo.
Team pahnih vawi ruk an inhmachhawn tawhah pawh Bosnia an chungnung zawk a, vawi thum hnehna changa vawi hnih tlawmin vawi khat an inhnehtawk. Manchester City striker hlui Edin Dzeko hi ven uluk ṭul tur a ni a, Belgium a hmachhawn hnuhnung paliah goal a khung vek!