Napoli neituin football agent-te a khak

Seria A club Napoli neitu Aurelio de Laurentiis chuan football agent-te chu sum duh uchuak leh player-te tana ṭha ber tur ngaihtuah sak lohah a puh.

Kum 67-a upa Laurentiis hian player a lakluh duh ṭhenkhat a neih theih loh chhan chu agent ṭhenkhat nen sum lama an inrem theih loh vangah a ngai hmiah niin a lang.

Movie producer ni bawk Lauren-tiis chuan, "Agent-te hi chhiah (tax) ang mai an ni. Hollywood-ah chuan actor-ten anmahniin an mahmawh an inlak khawm sakin midang an ruai vek kher lo, kei pawhin aiawh ka nei lo a - a ṭulna ka hre lo," a ti.

English Premier League club-te chuan October 2014 aṭanga September 2015 inkarah khan agent fee atan pound maktaduai 130 vel bawr an hmang nia sawi a ni a, hei hi a kum hmalama an hman aiin pound maktaduai 15 zetin a tam zawk.

Laurentiis chuan sawi chhun-zawmin, "Hei hi mi zawng zawng ka sawina a ni kher lo a, mah se ka hmuh dan chuan agent ṭhenkhat hi chu kan tana natna hlauhawm tak ang mai an ni. Kei chuan agent neih a ṭulna ka hre lo," tiin a sawi. Laurentiis hian China leh England-ah club neih a duh thu a sawi tel bawk.

Italian pa hausa tawntaw Laurentiis hian kum 2004 aṭang khan Napoli-ah hian thuneihna neiin khatih hun laia third division club kha hmasawn pui zelin Serie A-ah a kai chhohpui - tunah chuan Juventus el phak ber an ni der tawh.