Arsenal-ah Wenger a cham ang - Pires

Arsene Wenger-a hnuaia a vanglai hun lo hmang tawh Robert Pires chuan a pu hlui chuan a club ngai a enkawl chhunzawm zel a rin thu a sawi chhuak.

Wenger hian tun hnaiah North London club a enkawl kum 20 tlin a lawm hlim chauh a, tun season chhung chauh hi Emirates Stadium-ah contract a nei tawh. French manager hi Football Association lam chuan England team enkawltu atan an hmu tai hle ni a sawi a ni.

Premier League nomawi vawi hnih chawi tawh Pires chuan, "England team enkawl turin an duh tih a hriat a, amah pawhin a hreh lo niin a lang. Mahse, ka ngaihdan chuan Wenger hian a hna ngai hi a thawk chhunzawm ang, a chhan chu nitina training neih duh mi a ni," tiin national team enkawl aia club football a la tuipui zawka a hriat thu a sawi.

Pires chuan sawi chhun-zawmin, "England hian manager ṭha tak an duh a, an mi duh chu Wenger hi a ni chiang. Ani hian football-ah tawnhriat a ngah bakah ṭawng a thiam sa bawk. Amaherawhchu Arsenal-ah hian thil tam tak a dinin a siam lian a, he club hi a hmangaih avangin hna dang a thawhsan ka ring lo," a ti.