A hma aiin a hautak dawn - Rosberg

Formula 1 championship hmahruaitu Nico Rosberg chuan tun hma zawng aiin a teammate Lewis Hamilton nen an inelna chu a hautak chhoh dawn thu a sawi.

Pathiannia tlan zawh tak Malaysia Grand Prix-ah khan engine chiang lo vangin Mercedes driver Hamilton-a'n intlansiak a hmachhawn tluan thei lo a, hetihlai hian Rosberg erawh pathumna a ni thung. German driver hian point 23 zetin Hamilton lakah hma a hruai fal mek.

Kum 31-a upa Rosberg chuan, "Lewis hi tlawm duh lo mi a ni a, a vanduaina avang khan tun hma zawng aia ṭha a tlan a tum dawn tih ka chiang. Inelna nuam leh hautak kan hmachhawn zui dawn a, chumi tur chuan ka inpeih tawh," a ti.

World champion nilai Hamilton pawhin a beidawn loh thu leh a tawp thlenga a beih zui tur thu a lo sawi tawh avangin pakhatna nih inchuha Mercedes driver pahnihte inum hi a hmuhnawm chho dawn.

Kuminah hian Grand Prix 21 awm tura ruahman a ni a, heng zinga 16 chu tlan tawh niin tlan hmabak panga chiah a awm tawh. Tun Pathianni hian Suzuka tlan kawngah Japanese Grand Prix tlan a ni leh ang.