Lahm-a'n Robben leh Ribery chelh duh

Philipp Lahm chuan Bayern Munich tana a khelhpui senior player pahnih Arjen Robben leh Franck Ribery te chu Allianz Arena-ah cham chhunzawm zel se a duh thu a sawi.

Kum 32-a upa Robben leh kum 33-a upa Ribery te hian tun season tawp thleng bak contract an nei tawh lo a, tun dinhmunah chuan German champion nen hian contract chungchang-ah inbiakna an la nei lo.

Germany captain hlui Lahm chuan, "Robben leh Ribery te hi kan hnena an cham chhunzawm a nih chuan a lawmawm hle ang. Anni pahnih hian theihna sang tak an neih bakah tawnhriat an ngah hle a, hun rei tak chhung world-class football an lo khel tawh," tiin a teammate-te a fak hle.