Vawiinah Relegation Battle Ramhlun North Vs Chhinga Veng; Dinthar Vs Zo United

Mizoram Premier League ti ngaih-nawmtu pakhat chu 'Relegation Battle' a ni a, vawiina Champhaia inkhel tur hi Round 7 chauh a la ni nachungin a hnuai lama awm team pali inkhel tur a nih avangin 'Relegation Battle' a chhiar theih a ni.

Chhun dar 12:00-ah MPL kaithar pahnih Ramhlun North FC leh Chhinga Veng FC te Chhangphut Field-ah an inhmachhawn dawn a, tlai dar 2:30-ah Zo United leh Dinthar FC an inkhel zui ang.

An intawng dawn ta

Ramhlun North FC-in MPL5 qualifier-ah Chhinga Veng FC hnehin an champion a, MPL khel turin an tling. Chhinga Veng erawhin MPL thleng turin Playoff-ah Luangmual FC an hneh hram. First Division inelnaah Chhinga Veng hi champion mah se season liam ta khan vawi khatmah Ramhlun North an hneh loh avangin vawiinah phuba lakna remchang an nei ve chauh.

Transfer laia thawm nei lian Chhinga Vengin beisei an pha lo a, I Day Football final an thlen hnuah Ramhlun Northin beisei an pha bik lo. MPL kaithar Chhinga Veng hi coach thar Chawngthansanga hnuaiah vawi hnih khel tawhin an la chak lo ve ve a, Ramhlun North hi an match hnuhnung paliah an la chak lo vek bawk.

Table-a palinaa awm mek Aizawl FC pawhin point 10 an hmuh tawh avangin vawiina chak lo tan semifinal kawng a zim dawn a, club pahnih hian inkhel pawimawhzia an hre chiang.

Chhinga Veng-ah Emma

Chhinga Veng FC-in result ṭha nei turin MPL3-a Aizawl FC champion puitu defender Emma Chigozie an lalut a, Nigerian defender hian Ramhlun North hmachhawn turin bul a ṭan nghal tur thu coach Chawnga chuan Vanglaini palai a hrilh.

Table mawngphaha awm Dinthar FC tih loa goal chhuah hnem ber Chhinga Veng hian Emma an neih takah chuan an goal nawr a na sawt dawn tihna a ni a, Ramhlun North tan MPL5-a goal thum khung tawh Lalkhawpuimawia ven uluk a ṭul dawn tihna a ni.

Chhaia a dam

Ramhlun North-in an match hnuhnung bera Aizawl FC an hmachhawn ṭumin an thiampuipa Zosangliana (Chhaia) chu damlohna vangin bench-ah an ṭhuttir a, I Day Football best player Chhaia hi tunah chuan a dam tawh.

Tawia naute ṭhatna ber erawh mimal lam ni loin team thawhhona ṭha a ni a, Ramhlun North hian I Day Football-a an phurna kha an neih leh a ṭul. Hemi tur chuan tlarhma lama awm Vanlalthlamuana, B. Malsawmzuala, David Lalrinchhana leh Jerry F. Zonunsanga ten an theihna an phochhuah theih a ṭul dawn a ni.

Eng nge an sawi?

Chhinga Veng coach Chawngthan-sanga chuan, "Ramhlun North-in tun hnaia result ṭha an neih loh chhan hi an vanduai vang a ni a, keini pawh kan vanduai vang thoin match hnuhnung pahnihah kan chak lo. Tunah chuan vannei zawk an awm a ṭul dawn a, kan vanneih zawk ka beisei. Champhai lam player pakua zet kan nei a, keini tan chuan Chhangphut Field hi kan mual ang hialah a ngaih theih ang," tiin point hmuh a inbeisei thu a sawi.

Ramhlun North coach Lalruatliana Sailo (Tawia) chuan, "Kan player pathum Israel, Ruatfela leh Hmangaiha te chu inhliam vang leh college internal exam vangin kan chhawr thei lo a, a kalte erawh kan damṭha. Champhaiah result ṭha tak ka neih ngei ka beisei," tiin Vanglaini palai a hrilh.

Point thum inbeisei

Zo United coach Van­lalrova chuan, "Kan fixture a fuh tawk loh avangin club
ṭha kan tum hmasa a, point hmuh a harsa. Ramhlun North leh Dinthar FC te an kan la hmachhawn dawn avangin Phase 1 zawhah hian kan dinhmun a ṭhat ngei ka ring," tiin Chanmari FC laka point khat an hlawhchhuah hnuah a sawi.

Lalnunsanga (Tale-a) goal hmangin Zo United-in Ramhlun North an hneh a, vawiina Dinthar FC an hneh leh chuan Rova thusawi dikna famkim kan hmu ang. Chutihrualin Dinthar FC hi awlsam taka hneh chi an ni lo - MPL1 champion hian an match hnuhnung berah Aizawl FC an chelh a, vawi khatmah chak la nei lo mah se an khingpui vawi thum an draw tawh.

Dinthar FC coach Lalhlupuia Sailo chuan, "Zo United khelh dan hi kan zirchiang a, an
ṭhatna leh ṭhat lohna kan hre tawhah kan ngai. Point thum hmu turin Champhai kan pan a, kan inpuahchahna pawh a
ṭha. Chutihrualin chak leh chak loh chu Pathian thu thu a ni," tiin point thum hlawhchhuah an inbeisei tawh thu a sawi.

Zo United player pawi­mawh Chhanrin^­pianga a inhliam a, MPL1 champion tan thu lawmawm a ni. Rova chuan, "Valrina leh Jonathan (Champhai tlang­val) te an inhliam avangin kan chhawr thei lo. Amaherawhchu chak turin player kan nei ṭha a, khawtual player kan ngah avangin kan dinhmun a
ṭha zawk turah ka ngai," tiin Vanglaini palai a hrilh.

Zo United defender pawi­mawh Malsawma Chhangte hi Champhai Veng­lai tlangval a ni a, a kawppui Lalnunpuia pawh Champhai tlangval tho a ni.