Champhaiah Chanmari an vul
Bethlehem Veng-thlang FC-in Mizoram Premier League Season 5-ah hneh loh an tawng ta a, an ngam loh chu Chanmari FC an ni.
Nimin tlai Chhang-phut Field-a inkhel hmuh-nawm takah Lalsangzuala Hmar hoten Lalruatfela Zote, Lalrammawia, Mal-sawmfela leh Vanlalbiaa Chhangte te goal hmangin Bethlehem Vengthlang FC chu 4-1 in an sawp a, Lalbiaksanga Colney hote chak kaltluang chu tihtawpin a awm ta.
Sawmfela leh Fela
Malsawmfela thlawp turin Fela Zote a dam tawh a, Chanmari FC goal nawr a na sawt. Ramhlun South tlangval Sawmfela'n Chhangphut Field-ah a theihna lantirin Fela Zote-in minute 35-naa goal hmahruai a khungna kawngah player pawimawh a ni.
Chanmari FC-in inkhel an thunun a, inhliam ngah BVT laka goal an khung takah chuan chak chiang tura ngaih an ni. Amaherawhchu BS-a hote an huaisena PC Zo-sangliana hmangin first half tawp hma hretin BVT-in an sut.
Second half-ah BVT-in chak an duh tih lantirin PC Zosanga hmang bawkin goal hnihna an khung a, offside vangin pawm a ni lo. Champhaiah BVT an vanduai a, midfielder Lalmawizuala tihsual vangin Lalrammawia'n an veng club lamah Chanmari hmahruaina goal minute 65-naah a khung.
Hemi hnu hi chuan BVT an thochhuak tawh lo a, Chanmari FC-in Sawmfela penalty leh Mabiaa goal cool tak hmanga khung belhin 4-1 in hnehna an chang.
BS-a lawm lo
BVT coach BS-a Col-ney chuan, "Chak loh chhuanlam neih hi ka duh lo. Amaherawhchu referee vanga chak loh kan ni a, kan referee-te hi vau zam theih an ni. Chanmari player-te'n referee an vau hnuah 50-50 thutlukna turah a vanduai zawk kan ni zel. Muanzova khan penalty hlawh chhuak turin a tlu der a, Sawmfela khan field pawn a chhuah hma khan shinguard a phelh a, yellow card vawi hnihna pek a ni lo," tiin referee chungah a lungawi lo.
Chanmari FC manager Mawitea chuan, "Kan khelh danah kan lawm a, kan phu ang ngeiin kan chak a ni. Point thum kan hmuh takah chuan BVT nen kan inthlauhna a zim sawt a, kan result-ah kan lungawi hle," tiin chak phu zawk an nih thu a sawi.
Tute nge inlan?
Chanmari FC (4-3-3) : Lalrinnunga Hnamte; Thomas Lalengkima (C. Lalrosanga 65'), Lalmuanawma, Lalrinchhana Tochhawng, Ramfangzauva; Vanlalbiaa Chhangte, Rochhingpuia (Lalrammawia 59'), Lalrinchhana; Lalruatfela Zote, Malsawmfela (C. Vanlalhriatpuia 89'), Lalmuanzova
Bethlehem VT (4-2-3-1) : Malsawmdawngzela; Lalnghinglova (MP-a), H. Lalhlimpuia, Laldinpuia, Hmingthanmawia; Lalrinnunga, Zosangkima; Lalrammuanpuia, Lalmawizuala, R. Lalrinsanga; PC Zosangliana
ZoFooty Statistics
Chanmari FC 4 - 1 Bethlehem VT
CFC : Lalruatfela Zote 35'; Lalrammawia 65'; Malsawmfela 70'; Vanlalbiaa Chhangte 75'
BVT : PC Zosangliana 43'
MoM : Lalruatfela Zote, CFC
54% Ball Posession 46%
17 Shot(s) 12
9 On Target 4
1 Yellow Card(s) 3
0 Red Card(s) 0
Powered By Rainbow Multibrand
Mobile Showroom