West Warrior-in foreigner 2 awmna AFC hneh

Chanmari West FC chu Aizawl pawna Mizoram Premier League inkhela chak hmasa ber an ni. HC Zarzoliana hote hian record siam turin Mizo club zinga I League khel thei awmchhun Aizawl FC an hneh a, MPL5-ah a zawna match nga hneh loh tawng tawh lo West Warrior hi dahhniam theih an ni ta lo.

Chhangphut Field-ah Lammual lama langsar Laldampuia bawk a langsar a, MPL5-a goal nga khung tawhtu West Warrior captain hian minute 67-naah Aizawl FC kulhpui Lalramchullova a bum hnuah mual dinglam aṭangin ball ṭha tak a vawrh lut a, Lalṭhakima'n an lamah tlawh lut. AFC defender Ṭhakima hi MPL5 bika mahni lama tilut palh hmasa ber a ni.

Chanmari West hi inchhuang thei an ni chuang lo a, goalkeeper Lalruatpuia (Mama) chu man of the match a thlan a ni. Mama hian first half-ah Brandon VL Remdika tauh leh B. Zoramthara ball pet a dan sak bakah second half-ah Bright Middleton Mends-a shot ṭha tak chu a dan sak bawk. Ghanaian forward ball pet hi Mama'n dang perin substitute Lalremsanga'n crossbar a pet per bawk.

Aizawl FC hian West Warrior hi hneh ngei tumin Bright Mends bakah Benjamin Eniwo Onome chu inkhel bul an ṭantir a, Nigerian midfielder Benjamin erawhin minute 11 chiah a daih. Hemi aṭanga lang chu Chanmari West-in AFC ṭhat theih dan ber an hneh a, point 13 an hmuh tak avangin semifinal lut turin an dinhmun a ṭha hle.

Aizawl FC coach Malsawmkima chuan, "Goal kan khung theih miau loh avangin kan chak lo a ni. Field a ṭha a, chhum a zin avangin ni a sa lutuk hran lo bawk a, hei vang hian sawisel tur ka nei lo. Champhaia MPL kan khel thei hi a lawmawm ka ti a, hmun dangah pawh la khel zel thei ila a duhawm hlein ka hria," tiin chak loh chhuan lam a siam lo.

Tute nge inlan?

Aizawl FC (4-3-3) : Zothanmawia; Lalrinzuala Khiangte, Lalramchullova, Lalṭhakima (Lalnuntluanga 83'), Ricky Lallawmawma; Benjamin Eniwo Onome (F. Lalremsanga 31'), Rohmingthanga (H. Lalbiakthanga 75') , B. Zoramthara; Albert Zohmingmawia , Bright Middleton Mends, Brandon Vl Remdika

Chanmari West FC : Lalruatpuia ; Calvin Zosiamliana (Racy K. Lalremmawia 66'), R. Lalawmpuia, Toky Zo­muan­puia, Vanlalzuia Hnamte; K. Lalnunzama; R. Laldanmawia, Lalbiakhlua, Lalmuanzuala, Laldampuia; H. Lallianzama (Lalmuansanga 66')

ZoFooty Statistics

Aizawl FC 0 - 1 Chanmari West FC

CWFC : Lalṭhakima 67' (OG)

MoM : Lalruatpuia (Mama), CWFC

62% Ball Posession 38%

17 Shot(s) 10

8 On Target 2

2 Yellow Card(s) 1

2 Red Card(s) 0

Powered By Rainbow Multibrand

Mobile Showroom