Zion Williamson-a'n bul a ṭan fuh

Nimin zinga New Orleans Pelicans leh San Antonio Spurs te an inkhelh ṭumin NBA Draft number one pick Zion Williamson a inlan ṭan a, Pelicans chakpui lo mah se point 22 neiin bul a ṭan ṭha hle.

Spurs hian 121-117 in hnehna an chang a, kum 19 mi Williamson-a bench lama a ṭhut hmain Pelicans hian point khatin hma an hruai thung. Inkhelh banah Williamson chuan, "Kan chak lo tih loh chu ka duhthusam ang vekin a thleng. Mipui thawm khan phurna nasa tak min pe a ni," tiin a sawi.

Feet ruk leh inches ruka sang Williamson hi inkhel ṭantirh lamah che ṭha tawk lo mah se fourth quarter-ah a zawnin point 17 a nei a, three-points vawi li a luh zinga vawi thum hi quarter tawp berah a lut bawk.

Pelicans forward Williamson hian khup hliam vangin season ṭantirh game 44 chhung a khel thei lo. Coach Alvin Gentry chuan, "Tihsual chu a nei ve bawk ang tih chu ka rin dan sa a ni a, mahse a tlangnel chinah chuan a theihna ngahzia kan hmu," tiin a fak hle.

Mipui lam MVP tiin an au rual a, amaherawhchu Alvin Gentry-a'n bench-ah a ṭhuttir tak avangin mipui thawm pawh 'Zion kan duh' tiin a inthlak. Williamson chuan, "Kum 19 mi chauh ka ni a, dik taka sawi chuan ka khel tluan lo kha pawm thiam a har. Khelh rei hrim hrim ka duh vang ni loin chak ka duh a ni," tiin team chakpui chu a thupui ber a nih thu a sawi.