Italy laka phuba la thei lo Spain

Spain-in Euro 2016 last 16 aṭanga hnawt chhuaktu Italy lakah phuba lakna remchang nei mah se an hun ṭha neih an chhawr thei lo a, Ningani zan khan World Cup qualifier-ah goal khat ve ve khungin an inhnehtawk. Spain tana Vitolo goal hmahruai khung chu hun tawp hnaih lamah Daniele de Rossi chuan penalty aṭangin a sut a ni.

Ningani zana team pahnih inhmachhawn hma hian Italy-in World Cup emaw Euro qualifier match 51 an khelh tawhah tlawm hmel an la hmu miah lo a, team ṭha Spain meuh an hmachhawn hnuah pawh an record duhawm an chhawm nung zel - match 52 chhung chu ngam loh an tawng lo ta.

Italy hian qualifier-a ngam loh an tawn hnuhnung ber chu September, 2006 daih tawh khan a ni a, Euro 2008 qualifier-ah France chu 3-1 in an hneh lo. Hemi hnuah erawh Italy hian tlawm hmel an hmu leh ta lo a ni.

Group G inkhel dang-ah Albania chuan 2-0 a Liech-tenstein hnehin hmahruai-tu an ni a, Israel chuan 2-1 in Macedonia an hneh bawk.

Vanduai Spain

Juventus Stadium-a inkhelah mikhual Spain an tlangnel zawk a, Spanish player-te ball khalh chu Azzurri player-ten an um ni berin a lang! Spain hian first half-ah 72.4% ball an chang a, hetichung hian an pet goal thei lo. Andres Iniesta leh David Silva te mawi taka an in one-two hnuah goal hmaah an hriam tawk lo a, Gerard Pique chuan hnai set sawt aṭangin Italy keeper Gianluigi Buffon zawnah a tauh bawk.

Minute 55-naah Spain an vannei ta nge nge a, kum 58-a upa Buffon tihsual nangchingin Sevilla forward Vitolo chuan mikhual team tan goal hmahruai a khung. Mahse, Italy-in substitute Ciro Immobile an luhtir hnuah Spain goal-ah an nawr na sawt a, Sergio Ramos chiâi in Eder a tih tluk hnuah De Rossi chuan penalty chhuih lutin point khat hlu tak an hlawh chhuak.

Manager thukhawchang

Italy coach Giampiero Ventura chuan, "Kan player-te taksa lama an la inpeih loh dan leh Spain player-te thiamna ngaihtuah chuan result ṭha tak a ni. Goal kan chhuah hnuah ka naute an talbuai duh lo a, Spain hi kan group-a team ṭha ber angin sawi ni mah se zaninah khan zirlai ropui tak zir nan kan hmang a ni," tiin a naute khelh dana a lawm thu a sawi.

Spain coach Julen Lopetegui chuan, "Chak zawk ni turin hun ṭha kan neiin ka hria. Mahse, kan team hmachhawn hi Italy an ni miau a, a tir lamah ngam viau mah ila movie hmuhnawm taka a changtupa ang maiin thawh leh dan hi an hre tlat a ni. Team ṭha tak an ni a, player ṭha tak tak an kawl a ni," tiin an khingpui team a fak.