14th HPC Cup 2025-ah Zobawk South an champion

Nimin khan Lunglei District-a football inelna ngaihhlut 14th HPC Cup final chu C. Ṭhuamluaia Mualah khelh a ni a, entu ṭhahnem tak hmaah Zobawk South-in Zohnuai 3-2 a hnehin an champion. Final-a goal nga luhna inkhel hi a tawp thlengin a hmuhnawm a, hun tawp dawn hnaihah Zohnuaiin box chhunga handball vangin penalty beisei mah se pek an ni lo - an vanduai takzet.

Zobawk South hian Vanlalhriatrenga hmanga first half-a hma an hruai hnuin second half-ah Vanlalhriatrenga'n a goal hnihna a tauh lut. Inkhelah Zobawk South chungnung chhunzawmini minute 75-naah Stephen C. Malsawmtluanga'n goal thumna mawi zetin a volley lut a, chak tur a chiangah a ngaih theih.

Mahse, Zohnuai an la tlawm lo. Minute khat pawh tling loah Vanlalramnghaka hmangin siphurh an sut ṭhen a, Zobawk South-in goal an khung belh theih loh avangin inkhel a nung zel. Minute 88-naah Stain Lalṭanfela'n mual vei lam aṭangin Zohnuai tan goal ṭha bik a khung a, inkhel a nung thar hle.

Zohnuaiin chance insiam leh mah se an khung belh thei tawh lo a, Zobawk South ṭang tluanin 3-2 in hnehna an chang. HPC Cup 2025-ah hian Veteran inelna a awm bawk a, Zotlang leh 2nd Bn MAP te hun pangngaiah 0-0 a inhnehtawkin penalty shootout-ah Tetea Tlau telna Zotlang 4-2 in an vannei ta zawk.

HPC Cup Thlirna Tawi

Veteran final

Zotlang 0 - 0 2nd Bn MAP

Penalty Shootout-ah Zotlang 4-2 in an chak

Fair Play: Assam Rifle

Best Player: T. Zodinthara (Tetea Tlau), Zotlang

Top Scorer:  Lalsanglura Hmar, Assam Rifle

Mipa final

Zohnuai 2 - 3 Zobawk South

ZOH : Vanlalramnghaka 76', Stain Lalṭanfela 88'

ZOB : Vanlalhriatrenga 4', 58'; Stephen C. Malsawmtluanga 75'

PoM Vanlalhriatrenga, Zobawk South

Fair Play: Zohnuai

Best Goalkeeper: Lalchhanchhuaha Sailo, Zobawk South

Best Defender: H. Vanlalnundika, Zohnuai

Best Midfielder: ZD Laltlansanga, Zobawk South

Best Forward: Lalthanzuala, Ramthar (6 goals)

Top Scorer: Lalrintluanga (Tutua), College Veng (6 goals)