Dortmund-in Barca hneh mah se a tawk zo lo

Champions League quarterfinal second leg-ah Broussia Dortmund chuan 3-1 ngawtin Barcelona an hneh a, mahse, first leg-ah 4-0 a an lo tlawm tawh avangin German club tan a tawk zo lo.

Dortmund tan striker chhuanvawr Serhou Guirassy chuan hattrick a siam a, mahse, first leg-ah goal an lo chhuah hnem hret avangin awmzia a nei thui lo a, an tlawm ta tho.

Signal Iduna Park-a inkhelah Barcelona-in goal an khung ve miah lo a, an goal neih ve chhun pawh Dortmund defender Ramy Bensebaini-a'n an lama a tihluh a ni.

Inkhel hmasa nena belhkhawmin, Barcelona hi 5-3 in an chak a, Champions League semifinal an lut - Catalan club hian La Liga-ah hma an hruai mek a, Copa del Rey final an lut tawh bawk.

Beiseina

Dortmund-in first leg-ah 4-0 ngawtin Barcelona an ngam lo a, German club tan UCL beiseina a tawp tawh anga sawi ngam a ni. Inkhelh zawhah manager Niko Kovac pawhin, "Thilmak kan mamawh ang," tiin a sawi hial.

Mahse, he thilmak beiseina hi rin aia hmain chhawpsak kan ni a, minute 11-naah Dortmund hian penalty an hlawh chhuak. Barca keeper Wojciech Szczesny chuan Pascal Gross a titlu a, referee-in penalty spot a kawk nghal.

Inkhel boruak sangah Guirassy chuan panenka hmangin tawnhriat nei ṭha Szczesny a pet khum - a thisen a sang hle! Dortmund ṭantute thawm a ṭha a, si thum lai la phur mah se, beiseina an nei.

Hrem vanga first leg khel thei lo, penalty hlawh chhuaktu Gross chu Barca tan player hnawksak a tling a, chawlhlawk hman a nih hmain Bensebaini leh Karim Adeyemi te chance hlauhawm tak chu Szczesny chuan a dansak bawk.

Dortmund an phur

Kum 2017 khan Barcelona chuan khualmualah 4-0 ngawta an tlawm hnuin Paris St-Germain an lehthal a, Nou Camp-ah 6-1 a hnehna changin Paris club hi an pet chhuak daih - hemi tih loh hi UCL-ah first leg-a si li phur tawh, comeback an la awm ngai lo.

Mahse, Dortmund-in beiseina an neih chhunzawm. Second half ṭan aṭanga minute lina lekah Guirassy bawk a inlar a, khel ṭha em em mai Bensebaini siamsak chu goal-ah a chantir!

2-0 a ni a, goal hnih dang a la ngai cheu. Minute 54-naah Dortmund hnual rawihna tham boruak a thleng thung a, Fermin Lopez-a ball pet chu Algerian defender hian an lamah a tilut a, 2-1 a ni.

Barca-in goal an khung hian minute 36 chiah hun a awm tawh a, Dortmund tan 'comeback' a harsa dawn tih a chiang tawh. Guirassy-a'n minute 76-naah hattrick siamna goal a khung zui a, a team erawh a tlangpui zo ta lo.

A thlawn mai maw

Barcelona tlarhmaah Raphinha, Lamine Yamal leh Robert Lewandowski te an awm a, mahse, Dortmund-in player pathum hi an dah ṭha thei - Guirassy-a'n hattrick a siam bawk.

Mahse, "A bul ṭan ṭhat chu a chanve zo ang," tih thu a dikna kan hmu a, first leg-a an chet ṭhat hmangin Barca chu chhanhimin an awm a, nizana Bayern Munich leh Inter Milan inkhela chak zawk chu semifinal-ah an hmachhawn ang.

Guirassy tan erawh a career-a zan ropui ber pawl hi zan lungngaihthlakah a chang zo a, hattrick-in awmzia a nei lo - Guinea international hian tun season UCL-ah goal 13 a khungna chiah a ni a, assist vawi nga nei bawkin, top scorer a ni mek.

Season hmasa lawka VfB Stuttgart tana match 30-a goal 30 khungtu striker hian Dortmund a pan hnuah pawh a hming a chher chhunzawm zel a, tun season-ah match 40-ah goal 28 khungin assist vawi kua a nei tawh - season tharah club lian zawk an lang a nih pawhin a mak lo ang.