Cherries-in Iraola chelh tum

Premier League club, beisei phak baka season hmang ṭha Bournemouth chuan an coach Andoni Iraola chu contract thar an zawrh dawn a, club neitu, American sumdawng hausa Bill Foley pawh tun kar hian Iraola nena indawrna nei turin England-ah a zin ang.

Foley hian April 19, Inrinni zana Bournemouth leh Crystal Palace inkhel chu a hmunah a en ang a, an club training-na hmunhma thar hawnna nei nghalin, Iraola nena an indawr tur chu a ngaih pawimawh zingah a tel bawk.

Kum 42 mi Iraola hian June 2023 khan Cherries hi a zawm a, kum hnih chhung atan contract a ziak. Bournemouth-a a season hmasa berah point 48 hmuhpuiin, table-ah 12-na an ni a, English top flight league-a an thlen san ber ṭum a ni.

Cherries hian May 2024 khan kum khat dang atan contract thar an ziahpui lehnghal a, tunah kum rei zawk chelh tumin hmalakna an kalpui leh mek.

Iraola kaihhruaina hnuaiah Cherries hian season duhawm tak an hmang mek a, table-ah pariatna dinhmun luah mekin, season tharah an club chanchina a vawi khat nan European football khelh an beisei mek.

Iraola hi club talbuai tak Tottenham Hotspur lam chuan an thlithlai mek nia sawi a ni a, Spurs hi head coach Ange Postecoglou hnuaiah beisei an phak lo mek a, London Hmarveng club hian Australian coach hi ban an rilruk nia sawi a ni.

Hetihrual hian Cherries lam chuan an coach hi an chelh theih ngei an inbeisei a, Rayo Vallecano boss hlui hi hun rei zawk atan an chelh thei a nih chuan Bournemouth tan chanchin lawmawm a tling ang.