Cavani-a'n Man United a chakpui

Manchester United chuan Nilaini zan khan Edinson Cavani goal ṭha zet hmangin Everton 2-0 in an hneh a, League Cup semifinal an lut. Goodison Park-a inkhelah hian Cavani-a'n minute 88-naah goal hlu tak a khung a, injury time minute ruknaah Anthony Martial-a'n chak nemnghehna goal a khung leh bawk.

Ole Gunnar Solskjaer-a hote hian semifinal-ah Manchester City an hmachhawn dawn. Season liam ta khan Pep Guardiola hoten semifinal-ah Man United hi an hneh a, an champion zui. League Cup quarterfinal inkhel dangah Tottenham Hotspur-in Stoke City 3-1 in an hneh. Jose Mourinho hote an vannei a, semifinal-ah Championship club Brentford an hmachhawn dawn.

Manchester United-in Premier League-ah Leeds United 6-2 in an sawp a, Solskjaer-a'n Whites hnehtute aṭanga player pakua zet a thlak chungin United tana bul ṭantute hi an la hraw hle.

Captain Harry Maguire leh Bruno Fernandes te chiahin bul an ṭan nawn a, player dang pakhua te chu Dean Henderson, Axel Tuanzebe, Eric Bailly, Alex Telles, Paul Pogba, Nemanja Matic, Mason Greenwood, Donny van de Beek leh Edinson Cavani te an ni. 

Inkhel pawimawh pahnihah hian United tan Juan Mata leh Fred ten bul an ṭan lo ve ve a, hei hian Solskjaer-a'n player thlan tur a ngahzia a sawifiah. Everton manager Carlo Ancelotti-a'n Arsenal hnehtu aṭangin player pathum chauh a thlak.

Toffees tan hian Gylfi Sigurdsson, Richarlison leh Dominic Calvert-Lewin te an khelh avangin inelna an la thutak tih a hriat a, chutihrualin James Rodríguez erawh hliam vangin a la inlan thei lo.

Goodison Park-ah entu 2,000 en phalsak an ni a, boruak an tih nun phah. Amaherawhchu mualneitu aiin mikhual team-in bul an ṭan ṭha zawk a, goal chance pawh an ngah. 

Dutch midfielder Van de Beek-a'n hun ṭha a bawhpelh a, Uruguayan forward Cavani-a'n chance ṭha tak nei mah se keeper Robin Olsen-a'n a goal khung tur a zawn zatin vawi hnih a dan sak.

Everton chance neih ṭhat ber chu freekick aṭangin a ni a, Sigurdsson-a freekick pet chu keeper Dean Henderson-a'n ṭha takin a dang. First half-ah goal a lut lo a, team pahnihah Toffees an lawm zawk ang.

Second half-ah pawh Man United an khel ṭha chhunzawm a, ṭan phat aṭangin an nawr nghal. Goal hmuh tur a awm mai loh avangin Solskjaer-a'n tlarhma tih chak nan Anthony Martial leh Marcus Rashford te chu bench aṭangin a luhtir.

United-in ball an chang tam a, chutihrualin pass sual an ngah. Everton pawhin tihsual an ngah ve tho. Tihsual ngah ve veah United an khel ṭha zawk a, amaherawhchu goal hmaah an vannei tawk lo.

Bruno Fernandes-a'n box pawn aṭangin goal zawnah a pet thei lo a, Martial lah a ke vei lama petna hun ṭha a neih chu a ke dinglamin a khak hmasak avangin ho lam takin hun ṭha a khawhral.

Solskjaer-a'n Cavani chungah rinna a nghat tlat a, first half-ah a vanduai tawh chungin a thlak duh loh. Uruguayan striker hian a pu rinna hi goal hmangin a chhanglet a, minute 88-naah Martial-a pass chu Cavani hian a ke vei lamin goal kilah tak kawh zetin a pet goal.

Goal luh hnuah Everton-in chak tuma an nawr avangin counter attack hmangin United-in chance ṭha an ngah. Bruno Fernandes-a'n crossbar a pet per a, Rashford-a'n Cavani hnen aṭanga a ball ṭha hmuh chu keeper Olsen-a zawnah a pet. A tawpah erawh Man United-in goal an khung ta tho a, injury time minute ruknaah Rashford-a ball pek chu Martial-a'n cool takin a khung.

Everton boss Carlo Ancelotti chuan, "Kan tan chuan inelna pawimawh tak a ni a, kan chak lo hi pawi kan ti. Kan khelh danah erawh inchhirna tur kan nei lo. Bul kan ṭan ṭha lo a, minute 20 a ral hnuah erawh kan tlarhnung a phui ṭha hle. Second half-ah pawh goal kan venghim ṭha a, penalty kan hruai thleng teuh viau a ni," tiin a sawi.

Man Utd boss Ole Gunnar Solskjaer chuan, "Nikum khan inelna pathumah semifinal kan lut a, Man United tan chuan a tawk lo," tiin champion ngei an tum thu a sawi a, an kheh danah a lungawi thu a sawi tel bawk. United hian Boxing Day (December 26) ah Leicester City an tlawh ang a, December 29 zanah Wolverhampton Wanderers an mikhual lehnghal ang.